Депутат Дастан Бекешев: "Укук коргоо органдары Кой-Ташта түзүлгөн кырдаалды көзөмөлдөгөнгө мүмкүнчүлүгүнө жараша аракеттерди кылышты". КҮНСОБОЛ

Кечээ, 12-декабрда Жогорку Кеңеште Кой-Таш окуясын иликтеген комиссиянын корутундусу тууралуу токтом кабыл алынды. Мамлекеттик комиссиянын атынан баяндама жасаган депутат Тынчтык Шайназаров мурдагы президент Алмазбек Атамбаевдин тарапташтары Бишкекте митинг уюштуруп, баш аламандык жаратууну каалашкандыгын айтты. Ал "укук коргоо органдары түзүлгөн кырдаалды көзөмөлдөн чыгарбай, саясий кырдаалдын курчушуна жол берген жок" деп билдирди.

SUPER.KG порталы "Кой-Таш окуясын иликтеген комиссиянын иш жыйынтыгында укук коргоо, көзөмөл, коопсуздук органдарынын аракеттерине туура баа берилдиби?" деген собол салды.

Жогорку Кеңештин депутаты Дастан Бекешев укук коргоо органдарынын жоопкерчилиги каралсын деген тапшырма берилгенин билдирди.

"Токтомдун негизинде Жогорку Кеңеш укук коргоо органдарынын жетекчилеринин жоопкерчилиги каралсын деген тапшырма берди. Алар да жооптуу да. Укук коргоо органдары Кой-Ташта түзүлгөн кырдаалды көзөмөлдөгөнгө мүмкүнчүлүгүнө жараша аракеттерди кылышты. Азыркы учурда укук коргоо органдарынын деңгээли төмөндөдү", - дейт Бекешев.

Автор: Жылдыз Джускембаева