Депутат Таабалды Тиллаев: "Башка мамлекеттерге, уюмдарга өздөрүнүн сүрүн көрсөткөнгө жол бербешибиз керек". КҮНСОБОЛ

2015-жылы өмүр бою эркинен ажыратылган Азимжан Аскаровго сыйлык тапшырылганына каршылык билдирүү максатында, Кыргыз өкмөтү АКШ менен болгон макулдашууну бир тараптуу денонсация кылууга барган.

Жакында эле Европадагы коопсуздук жана кызматташтык боюнча уюмунун ЖМКлар боюнча өкүлү Арлем Дезирдин Кыргыз өлкөсүндөгү сөз эркиндигине байланыштуу бир тараптуу жана чыныгы кырдаалды чагылдырбайт деп айткан. Тышкы иштер министрлиги ЕККУнун өкүлүнө жана АКШнын Өкүлдөр палатасынын эл аралык иштер боюнча комитетинин ошол сыяктуу комментарийлерине карата "биз муну эгемендүү өлкөнүн ички иштерине кийлигишүү аракети деп баалайбыз" деди.

SUPER.KG порталы "АКШга жана ЕККУга Тышкы иштер министрлигинин "эгемендүү мамлекеттин ички иштерине кийлигишпегиле" деп коңгуроо какканы туура чечим болдубу?" деген собол салды.

Жогорку Кеңештин депутаты Таабалды Тиллаев Тышкы иштер министрлигинин коңгуроо какканын колдой турганын билдирди.

"Биз эгемендүү мамлекет болгондон кийин бардык ички маселелерди өзүбүз чечишибиз керек. Уюмдун же башка мамлекеттин ички маселеге кийлигишкенге укугу жок. Соттук иштерге сырткы эмес, ичтен президент, депутат, өкмөттүн дагы кысым көрсөтүүгө укугу жок. Тышкы иштер министрлиги туура коңгуроо какты. Бул сабак болушу керек. Башка мамлекеттерге, уюмдарга өздөрүнүн сүрүн көрсөткөнгө жол бербешибиз шарт", - дейт Тиллаев.

Автор: Жылдыз Джускембаева