Белгилүү манасчы Сапарбек Касмамбетов дүйнө салды

Маданиятка эмгек сиңирген ишмер, манасчы, дастанчы Сапарбек Касмамбетов 85 жашында каза болду. Ал бүгүн, 19-январда каза болгонун төкмө акын Азамат Болгонбаев ырастады.

Маркумду акыркы сапарга узатуу зыйнаты 21-январь күнү саат 10:00дө Бишкектеги Киргизия-1 конушунда орун алат.

Сапарбек Касмамбетов 1934-жылы Нарында төрөлгөн. Кочкордо окуп, таалим алган. Ал - манасчы, төкмө акын, Эл агартуунун отличниги, Балыкчы шаарынын ардактуу атуулу, "Манас-1000" юбилейлик медалынын жана "Даңк" медалынын ээси. 1987-жылдан бери Кыргыз өлкөсүндө өткөрүлгөн Манас айтуу боюнча сынактарда 7 ирет жеңүүчү болгон.

Сапарбек Касмамбетовдон “Семетей” эпосунун “Кырк чоронун өлүмү” эпизоду (1600 сап ыр) жазылып алынган. Андан сырткары СССР мезгилинде радио, телевидениелерге миңдеген саптар жаздырылып, азыр алардын фондунда сакталуу.

SUPER.KG порталы Сапарбек Касмамбетовдун жакындарына терең кайгыруу менен көңүл айтат.

Автор: Бактыгүл Момбекова