Депутат Аалы Карашев: "Вице-премьерликке күч органдарында иштеп кеткен адам келсе жакшы болмок". КҮНСОБОЛ

Бүгүн, 11-февралда вице-премьер-министр Жеңиш Разаков берген арызынын негизинде кызматтан бошотулду. Тийиштүү жарлыкка президент Сооронбай Жээнбеков кол койду. Разаков эки жылдан бери бул кызматты аркалап келген. Ал чек ара маселеси боюнча иш алып барчу.

SUPER.KG порталы "Чек ара маселелери боюнча иш алып барган вице-премьер кызматтан бошотулду. Бул ишти ким татыктуу аркалайт деп ойлойсуз?" деген собол салды.

Жогорку Кеңештин депутаты Аалы Карашев вице-премьер кызматына күч органдарында иштеп кеткен адам келсе жакшы болмок деген пикирде.

"Жеңиш Разаковдун отставкасы тууралуу акыркы кезде коомчулукта катуу талкуу болуп жаткан. Чек ара маселеси боюнча вице-премьер өзүнүн болгон мүмкүнчүлүгү менен аракетин жасады. Бирок аягына чыккан жок. Коомчулукта талкуудан улам кызматтан кетүү чечимин кабыл алса керек. Бул кызматка кесипкөй, чек ара маселесин жакшы түшүнгөн киши келиши шарт. Мурда күч органдарында иштеген, ошол тармакта түшүнүгү бар адам вице-премьерликке келсе жакшы болмок", - дейт Карашев.

Автор: Жылдыз Джускембаева