Жактоочу: "Равшан Жээнбеков чындык үчүн күрөшүүгө даяр экенин айтты"

Камактагы саясатчы Равшан Жээнбеков чындык үчүн күрөшүүгө жана Кой-Таш окуясы боюнча коюлган айыптар негизсиз экенин далилдеп берүүгө даяр экенин жактоочусу Замир Жоошевге айткан. Бул тууралуу жактоочу социалдык тармактагы баракчасына жарыялаган.

"Кечээ СИЗО-1 ге барып, Равшан Жээнбековго жолугуп келдим. Саясатчы аны колдоп жаткан бардык адамдарга ыраазычылык билдирди. Ал өзүн жакшы сезип жатканын айтып, саясатка, экономикага жана кылмыш ишине байланыштуу ЖМКлардын бардык суроолоруна жооп берүүгө даяр экенин билдирди", - деген Жоошев.

Равшан Жээнбеков Кой-Таш окуясы боюнча кармалган. Ал учурда 7 берене менен айыпталууда. Анын арасында "барымтага алуу", "массалык баш аламандыкты уюштуруу", "бийликти мыйзамсыз басып алууга аракет жасоо" беренелери бар. Анын бөгөт коюу чарасы 9-апрелге чейин узартылган.

Автор: Бактыгүл Султаналиева