"Мен коронавирус болгон жокмун" дейт Ала-Букада коронавирустан айыкты делген жаран. Министрлик буга эмне дейт?

1-апрель күнү Ала-Бука райондук ооруканасында дарыланып, коронавирус аныкталган эки жаран ооруканадан чыгарылган эле. SUPER.KG порталы илдеттен арылып, ооруканадан чыккан Насыр мырза менен байланышып, ден соолугун сурады.

- Саламатсызбы, Насыр мырза? Сизди коронавирустан айыгып чыкты деп уктук. Ден соолугуңуз жакшыбы? Өзүңүздү жакшы сезип жатасызбы?

- Рахмат, Кудайга шүгүр. Жакшымын. Элге ошондой маалымат берип жатышат. Бирок мен вирус жуктурган жокмун.

- Дене табыңыз көтөрүлүп, Ала-Букада ооруканада жатыптырсыз го?..

- Бизди 17-мартка караган түнү Ак-Коргон айылына обсервацияга алып барып жаткырышты. Ала-Букадан кичи ажылыкка 10 адам барып келгенбиз. Бирөө Оштон болгондуктан, аны Ошко жөнөтүштү, тогузубуз Ак-Коргондо калдык.

Обсервацияда жылыткыч жок суук экен, мен жука кийинип алып, башка бөлмөлөргө кирип, куран окуп жүрө берипмин. Ошого чыйрыга түшкөнмүн. 23ү же 24-мартта дене табым көтөрүлгөнү үчүн Ала-Бука райондук ооруканага алып келип, изоляцияга алышты. Жашым 58де болгону үчүн да чочулашты окшойт. Коронавирустун атайын белгилери бар экен го, менде андай болгон жок. Дарыгерлерге "Эмнеге мени кармап жатасыңар? Коронавирус жуктурупмунбу?" десем, "андай деле эмес, сасык тумоо болушуңуз мүмкүн" дешти. 2-3 укол алгандан кийин жакшы болуп калдым. 1-апрель күнү ооруканадан чыгарылдым.

Мен өзүмө-өзүм кылдым. Эгер жеңил кийинип жүрбөгөндө чыйрыгып, дене табым көтөрүлбөйт болчу. Обсервациядан кийин шериктерим менен үйгө чыгып кетмекмин. Башында дене табым 36 эле болуп туруп алды. Эки күн бир аз көтөрүлдү, ошол боюнча жөтөлгөн да жокмун, жакшы жүрдүм. Азыр үйдөн 2 аптага эч жакка чыкпагыла деп талап кылышты, камалып отурам.

- Сиз качан Сауд Арабиясынан кичи ажылыктан келдиңиз эле?

- 12-март күнү эл катары Бишкек шаарындагы "Манас" эл аралык аэропортуна келип конгонбуз. Ал жактан дене табыбызды текшерип, мурдубуздан анализ (ред. мазок) алып, айылга барганда аймактык оорукананын дарыгерлери байланышат деп жөнөтүштү. Ошентип ажылыктан келгендер такси менен Ала-Букага келгенбиз. Ошол боюнча дарыгерлер 17-мартта бизди обсервацияга алып кетишти. Азыр Кудайга шүгүр, абалым жакшы. Коронавирус тууралуу жаңы укканда дүйнө дүрбөлөңгө түшүп жаткандан кийин чын эле корктум. Бала-чака, башка элге жуктуруп алсам эмне болот деп ойлодум.

- Рахмат, сизге. Ден соолукта болуңуз!

Бул окуя боюнча Саламаттыкты сактоо министрлигинин басма сөз кызматынан төмөнкүдөй түшүндүрмө беришти.

- Ала-Бука районунун тургуну, кичи ажылыктан келген жарандан биринчи ПЦР-анализ алганда терс жыйынтык чыгып турса да, оң жыйынтыктын белгилери да болгон (ред. ложно положительный). Андан кийин экспресс-тест жасалган. Андан коронавирус бар экендигин көрсөткөн. Ошондон кийин бейтапты изоляторго алышкан. 14 күн дарылоодон кийин кайра ПЦР-анализ алганда бейтапта коронавирус жок болуп чыккан. Ошондуктан дарыгерлер ага "коронавирус эмессиз" деп айтышкан.