Нарын облусунда сутка ичинде 11 жарандан коронавирус аныкталып, көбү күч түзүмдөрүнүн кызматкерлери экени айтылды (видео, хронология)

Өлкөдөгү эпидемиологиялык абал тууралуу бүгүн, 19-майга карата жаңы маалыматтар берилди. Онлайн түрүндө өткөн брифингге саламаттыкты сактоо министринин орун басары Нурболот Үсөнбаев келди.

2020-05-19 10:31:00

Суроо: Обсервациялардан чыккандардын ден соолугу жакшы дегенге ишенсе болобу жана баары текшерүүдөн өтүшкөнбү?

Жооп: "Обсервациядагыларга лабораториялык изилдөө жасалып, кайрадан текшерүүлөр жүргүзүлөт. Бул обсервациянын талаптары. Анткени ушул ыкма менен вирустун жайылуусун алдын алабыз".

2020-05-19 10:23:00

Суроо: Чет өлкөдөн көптөгөн жарандарды алып келүү пландалууда. Алар дагы обсервациядан чыгаргыла деп чырдаса чыгарып жибереби?

Жооп: "Бул жерде министрликтин алгоритмине ылайык иш жүргүзүлөт. Обсервацияда жаткандар талаптарды аткарышы керек. Соль-Илецктен келгендерге туура эмес маалыматтар жеткендиктен, чыр чыкты. Биз түшүндүрүү иштерин жүргүздүк.

Белгилей кетсек, министрлик тиешелүү текшерүүлөрдөн кийин гана обсервациядагы жарандарды чыгарат. Жарандар обсервациядан чыккандан кийин дагы үй карантиндик шартында болушат. Эгер талаптар бузулса чара көрүлөт".

2020-05-19 10:18:00

"Бүгүнкү күнгө карата Нарында коронавирус аныкталган бейтаптардын 8и күч түзүмдөрүнүн кызматкерлери. Алар текшерүүгө алынып, тиешелүү иштер аткарылып жатат", - деди Үсөнбаев.

2020-05-19 10:15:00

Стационарларда 331 бейтап жатат, анын ичинен 12 жарандын абалы оор деп бааланып, бешөө жандандыруу бөлүмүндө жатат.

2020-05-19 10:11:00

Бир сутка ичинде өлкө боюнча 2 медициналык кызматкер коронавирус жуктуруп алды. Ал эми стационарлардан 7 медкызматкер сакайып чыкты.

Республика боюнча COVID-19 диагнозу жалпы 257 медициналык кызматкерден аныкталып, алардын ичинен 219 медкызматкер стационарлардан айыгып чыккан.

2020-05-19 10:10:00

Санкт-Петербургдан алып келинген мекендештердин арасында аскердик окууда жүргөндөр дагы бар. Бүгүнкү күндө алардын ичинен коронавирус жуктуруп алгандар бар экени тастыкталды.

2020-05-19 10:07:00

Сутка ичинде коронавирус аныкталган бейтаптар буга чейин ооругандар менен байланышта болгондор.

2020-05-19 10:04:00

19-майга карата стационарлардан 71 бейтап айыгып чыкты.

Айыккандар:
Бишкек – 55;
Жалал-Абад облусу – 11;
Нарын облусу – 2;
Баткен облусу – 3.

Жалпы 898.

2020-05-19 10:03:00

Сутка ичинде 27 жарандан коронавирус аныкталды. Алар:

Бишкек шаары – 6 (+1 Санкт-Петербург шаарынан келгендерден);
Чүй облусу - 3 (Соль-Илецк шаарынан келгендерден);
Нарын облусу - 11;
Ош облусу - 6.

Жалпы 1 миң 243.

Автор: Бактыгүл Момбекова