Бишкек шаардык соту Икрамжан Илмияновдун жаза мөөнөтүн 1 жарым жылга кыскартты

Бүгүн, 19-июнда Бишкек шаардык соту мурдагы президент Алмазбек Атамбаевдин мурунку кеңешчиси, камактагы Икрамжан Илмияновдун биринчи инстацияда берилген мөөнөтүн кыскартты. Бул тууралуу Илмияновдун жактоочусу билдирди.

Ага ылайык, шаардык соттун соттук коллегиясы Икрамжан Илмияновду 5 жыл 6 айлык мөөнөткө эркинен ажыратуу боюнча чечим чыгарган. Калган бөлүктөр боюнча Октябрь райондук сотунун өкүмү өзгөртүлгөн эмес.

Маалым болгондой, 2019-жылдын 30-октябрында Октябрь райондук соту мурдагы президент Алмазбек Атамбаевдин мурунку кеңешчиси, камактагы Икрамжан Илмияновду күнөөлүү деп таап, анын үй-бүлөсүнө тиешелүү мүлктөрдү конфискациялоо, 160 миң сом өлчөмүндөгү айып салуу жана 7 жылга камакка алуу чечимин чыгарган.

Автор: Бактыгүл Султаналиева