Кой-Таш окуясы боюнча сот отурумуна 9 жактоочу келбей калды. Алардын ооруп жатканы айтылууда

Кой-Таш окуясы боюнча сот жактоочулардын ооруп келбей калгандыгына байланыштуу жылдырылды. Бул тууралуу маалыматты SUPER.KG порталына жактоочу Жаманкул Жунусов билдирди.

"Бүгүн өтө турган процесске мени кошкондо 9 жактоочу барган жокпуз. Ага себеп жактоочулардын көбү ооруп жатыптыр. Биз сот ишин кароону токтото туруу боюнча өткөн отурумда өтүнгөн элек. Анткени ошол учурда эле сот процессинин катышуучуларынын бир тобу сыркоолоп жаткан. Ал өтүнмөдөн баш тартылган. Менин оюмча, Кой-Таш окуясы боюнча ишти деле Азиз Батукаевдин иши сыяктуу тез аранын ичинде жабуу аракети болуп жатат. Негизи кримтөбөл Батукаевдин иши менен Кой-Таш окуясын бир өндүрүшкө кошуп караса деле болмок", - дейт жактоочу.

Ал эми Биринчи Май райондук сотунун басма сөз кызматынан бүгүн, 1-июлга белгиленген Кой-Таш окуясы боюнча процесс жактоочулар З.Жоошев, Н.Токтакунов, У.Индикеев, У.Сейитбеков, Ж.Жунусов, А.Орозакунова, Ж.Бараков, Б.Шамбетов, Р.Шакировдордун келбегендигине байланыштуу жылдырылганын тастыкташты. Кийинки соттук териштирүү 3-июль күнү саат 10:00гө жылдырылганы маалымдалды.

Автор: Бактыгүл Султаналиева