Эфиопияда популярдуу ырчынын өлүмүнөн кийин массалык баш аламандык орун алып, 166 адам каза болду

Эфиопиядагы популярдуу музыкант жана саясий ишмер Хачалу Хундессанын өлүмүнөн кийин нааразычылык акциясы орун алып, андан кеминде 166 адам набыт болду. Бул тууралуу чет элдик басылмалар жазып чыгышты.

Маалыматка ылайык, Эфиопиянын Оромия штатында 145 жаран жана 11 коопсуздук кызматкери нааразычылык акциясынан улам каза болгон. Мындан тышкары дагы он адам, алардын ичинде эки полиция кызматкери өлкөнүн борбору Аддис-Абебада каза болгон. Нааразычылык акциясынан каза болгондордун саны дагы көбөйүшү мүмкүн, анткени ооруканаларда жабыркагандар көп.

Укук коргоо органдарынын кызматкерлери борбор шаар Аддис-Абебада тартипти калыбына келтирүүгө жетишти, бирок өлкөнүн ар кайсы шаарларында кырдаал курч бойдон калууда. Жергиликтүү маалымат каражаттарынын маалыматына караганда, 200дөн 2 миңге чейин адам кармалган.

34 жаштагы ырчы Хачалу Хундесса 29-июнда кечинде Аддис-Абебада атып өлтүрүлгөн. Бул кылмышка шектелип эки адам камакка алынган. Ырчыны колдогондор аны коопсуздук күчтөрү өлтүрдү деп айыпташты жана кылмышка саясий жүйө келтирип жатышат. Буга чейин ал бир нече жолу коркутуп-үркүтүүгө кабылган.

Автор: Азат Бейшенбеков