Түркияда коронавирус пандемиясы биринчи толкундун экинчи туу чокусуна жетти

Түркияда коронавирус пандемиясы биринчи толкундун экинчи туу чокусуна жетти. Бул тууралуу өлкөнүн саламаттыкты сактоо министрине таянуу менен түрк басылмалары жазып чыгышты.

Анда Түркиянын саламаттыкты сактоо министри Фахреттин Коджанын: "Пандемия уланып жатат. Күндөн күнгө илдетти жуктуруп алгандар көбөйүүдө. Биз биринчи толкундун экинчи туу чокусуна жеттик", - деп айтканы жазылган.

Министр Анкара, Стамбул, Измир, Бурса шаарлары жана өлкөнүн чыгыш провинциялары тобокел тобуна кирген аймактардын катарында экенин белгилеген.

Түркияда 2-сентябрга карата 1 миң 596 жаңы учур катталган. Учурда Түркияда болжол менен 19 миңден ашык кыргыз жарандары бар экени айтылып келет. Алардын көбү Стамбул, Анкара, Измир жана Анталия шаарларында жашайт.

Автор: Бактыгүл Султаналиева