Ат-Башы районунда уурулукка шектелип 3 жаран кармалды

Нарын облусунун Ат-Башы районунда уурулукка шектелип, 3 жаран кармалды. Бул тууралуу облустук милициядан билдиришти.

14-сентябрь күнү жергиликтүү милиция бөлүмүнө Ат-Башы районунун Баш-Кайыңды айылынын тургуну арыз менен кайрылып, минип жүргөн атын тушап койгон жеринен белгисиз адамдар уурдап кетишкендигин билдирип, таап берүүгө жардам берүүлөрүн суранган. Аталган факты Ат-Башы РИИБинде Кылмыштардын жана жоруктардын бирдиктүү реестрине катталып, сотко чейинки өндүрүштүк иши ачылган.

Ыкчам-иликтөө иштеринин жүрүшүндө шектүү катары Ат-Башы районунун тургундары 1979-жылы туулган Ш.А. 1996-жылы туулган Ж.У. жана мал уурулук менен мурда сот жообуна тартылган ошол эле райондун тургуну 1980-жылы туулган К.Ж. кармалган.

Шектүүлөр күнөөлөрүн толугу менен моюнуна алгандыктан Ат-Башы РИИБинин убактылуу кармоочу жайына 14-октябрь күнү камакка алынып, Ат-Башы райондук соту тарабынан үй камагына чыгарылган. Жогорудагы кармалган жарандар башка да кылмышка катыштыгы бар болушу мүмкүн экендиги боюнча ыкчам иликтөө иштери жана тергөө амалдары жүргүзүлүүдө.

Автор: Айсалкын Качкынбекова