Митингде жабыркаган бейтаптардын биринин абалы өтө оор деп бааланууда

5-6-октябрдагы митингде жаракат алган бейтаптардын биринин абалы өтө оор деп бааланып, жандандыруу бөлүмүндө жатат. Бул тууралуу саламаттыкты сактоо министри Алымкадыр Бейшеналиевдин бейтаптардын абалы менен таанышуу учурунда белгилүү болгонун басма сөз кызматынан кабарлашты.

Бүгүн, 22-октябрда министр Алымкадыр Бейшеналиев митинг учурунда жабыркаган бейтаптардан кабар алуу максатында Бишкектеги Травматология жана ортопедия илим изилдөө борборуна барды. Аталган медициналык борбордун директору Сабырбек Жумабековдун айтымында, денесинен ар кандай жаракат алган 500дөн ашык жабырлануучу медициналык жардам алуу үчүн борборго кайрылышкан, бардыгына керектүү медициналык жардамдар көрсөтүлгөн.

"Кайрылгандардын көпчүлүгү алгачкы медициналык жардам көрсөтүлгөндөн кийин, амбулатордук дарыланууга жөнөтүлдү. Учурда 15 бейтап дарылануусун улантууда, бир жабырлануучу жандандыруу бөлүмүндө. Динамикада бир аз жакшыруу байкалганына карабастан анын абалы өтө оор деп бааланууда, ден соолугуна тынымсыз көзөмөл жүргүзүлүп жатат. Калган бейтаптардын абалы туруктуу, бардыгы тиешелүү акысыз дарылануудан өтүшүүдө", - деп белгиледи Сабырбек Жумабеков.

Иш сапардын жыйынтыгында, министр жабыркагандарга бардык зарыл болгон медициналык жардамдарды көрсөтүүнү, керек болсо тиешелүү адистердин консультацияларын уюштурууну тапшырды.

Митингде жаракат алган 1250 жаран саламаттыкты сактоо уюмдарына медициналык жардам сурап кайрылып, анын 279у ооруканага жаткырылган. Бүгүнкү күндө 20 жабырлануучуга акысыз медициналык жардам көрсөтүлүүдө.

Автор: Бактыгүл Момбекова
Фото: Бактыгүл Момбекова