Садыр Жапаров мамлекеттик жана саясий ишмер Исхак Раззаковдун 110 жылдыгына байланыштуу куттуктоосу

Президенттин милдетин аткаруучу, премьер-министр Садыр Жапаров мамлекеттик жана саясий ишмер Исхак Раззаковдун 110 жылдыгына байланыштуу куттуктоосу жарыяланды.

"Кыргыздан тарыхый улуу бурулуш кезеңде, сынаакы мезгилде улут тагдырына күйө билген, өз журтун жандан артык сүйө билген Барсбек, Мукамбет-кыргыз (Тагай бий), Ормон, Кубат бий, Алымбек датка, Жусуп Абдырахманов, Абдыкерим Сыдыков сындуу журтбашылар чыккан. Мына ошондой улуу адамдарыбыздын катарында Исхак Раззаков атабыз да бар.

Мына бүгүн көрүнүктүү мамлекеттик жана саясий ишмер, кыргыздын чыгаан инсаны Исхак Раззаковдун 110 жылдыгы белгиленип жатат. Баарыңыздарды бул улуу даталуу күн – Исхак Раззаковдун 110 жылдыгы менен чын ниетимден куттуктаймын!

Бул биз үчүн маанилүү дата. Исхак Раззаковдун Кыргыз мамлекеттүүлүгүнүн бекемделишине орду зор.

Исхак Разаков Кыргыз өлкөсүнүн экономикасынын жана маданиятынын өнүгүшүнө чоң салым кошкон.

Исхак Раззаков социалисттик чарбанын, пландоо тармагынын мыкты адиси болгон.

Ошол мезгилде республиканын өнөр жай өндүрүшүндө иштей билген кадрлар зарыл болуп турган. Тилекке каршы, ал мезгилде андай кадрларды даярдоочу окуу жайлар Кыргыз өлкөсүндө жок болчу. Баары Москва же башка борбордук окуу жайлардан билим алып келишкен. Анын кадрлардын жетишсиздигин жоюу аракети менен борбордук окуу жайларында улуттук кадрларга арналган атайын квота маселеси чечилген, республиканын өзүндө илимий мекемелер, тийиштүү жогорку окуу жайлар ачылган. Мына ошондон тарта өнөр жай тармагындагы тиешелүү кадрдык таңкыстык чечилип, колго алынган.

Исхак Раззаковдун өлкөнүн экономикалык турмушундагы, маданиятты өнүктүрүү жаатындагы иштери дагы тарых бетинде калды. Анын тушунда жогорку жана орто окуу жайлары арбын ачылган, эне тилибизге – кыргыз тилине мамлекеттик деңгээлде көңүл бөлүнгөн, окуучуларга ысык тамак берүү уюштуруу маселеси каралган.

Ошентип Исхак Раззаков кадр маселесине, билим берүүгө абдан чоң маани берген. Мына ушундай иш-аракеттеринен эле анын чыныгы мекенчил болгондугу таасын көрүнүп турат.

Анын ташка тамга баскандай айтып кеткен учкул сөздөрүн бүгүн да туу тутуп, келечеги кең өлкөбүз – Кыргыз мамлекети үчүн таза иштеп берүүгө сөз беребиз.

Бул улуу инсандын жашап өткөн өмүр жолу бизге, баарыбызга чоң күч-кубат берет деп ишенем. Исхак атабыздын бизге багыт берчү сөздөрү баарыбызга дем берип, ар дайым эсибизде болсун. Исхак атабыздын жолун улайлы, бар бололу - бир бололу!" - деп айтылат куттуктоодо.