БШК: "Референдумга үгүт иштерин жүргүзүү үчүн демилгелүү топтор уюштурулат"

Референдумга үгүт иштерин жүргүзүү үчүн демилгелүү топтор уюштурулат. Бул тууралуу БШКнын төрайымынын орун басары Абдыжапар Бекматов билдирди.

"Референдум дайындалгандан кийин мыйзамга ылайык, референдумдун үгүт иштерине катышуу үчүн демилгелүү топтор уюштурулат. Алар референдумга каршы, жана макул болгондордон түзүлгөн топтор болот. Бул топтор дагы жарыяланган күндөн тарта 10 календардык күндүн ичинде БШКга топ түзүлгөнүн жарыялап, тиешелүү документтерди тапшырышы керек. Ошондой эле алардын дагы шайлоо фонддору түзүлүшү мүмкүн. Демилгелүү топтор ыйгарым укуктуу өкүлдөрүн шайлайт" , - дейт Бекматов.

Маалым болгондой, БШК президентикке талапкерди каттоо процессин аяктады. Эртең шайлоо өнөктүгүнүн алкагында шайлоо алдындагы үгүт иштери башталат. Президенттик мөөнөтүнөн мурда шайлоо 2021-жылдын 10-январына белгиленген. Аны менен бирге Референдумга да добуш берүү жүргүзүлөт.

Автор: Бактыгүл Султаналиева