19-декабрда Кыргыз Республикасынын президенттигине талапкер Абдил Сегизбаев үгүт өнөктүгүн Манас атабыздын мекени катары белгилүү болгон Талас жергесинде улады. Талапкер алгач Кароол дөбөнүн этегинде жайгашкан Манас атабыздын күмбөзүнө зыярат кылып, Куран окуп, андан кийин облустун тургундары менен жолугушту.
Президенттикке талапкер Абдил Сегизбаев жолугушууга келген тарапташтарына кысымга карабастан келгендери үчүн терең ыраазычылык билдирди: "Жолугушууга келип, чындыкты угуп, туура тандоо кылуу ниетиңерди көрсөткөнүңөр үчүн ыраазычылык билдирем. Бишкекте мен көптөгөн адамдар менен жолугушууларды өткөрүп жатам. Билесиздерби, айрым аткаминерлер мыкты иш алып баруу үчүн каражат жок дешет, башкаларына бийлик аздык кылса, дагы бири хан болгусу келет. Азыркы Конституция менен алар ансыз деле толук кандуу бийликке ээ, каалагандарын кызматка дайындап, каалагандай өкмөттүн жана фракциялардын иштерине аралашып жатышат. Булардын негизги кемчилиги мамлекеттик башкаруу жөнүндө түшүнүктөрү жок. Ага карабастан, “кожоюндарынын” тилине кирип, алар каалагандай кылып Баш мыйзамды өзгөртүүнү максат кылышты. Аларга бийлик жана мансап гана керек экени ачык эле көрүнүп турат. Бирок элге азыр акыйкаттуу башкаруу керек. Элибиз өзүн өзү гана бакпастан, аткаминерлерди кошо багып келишет".
Жолугушууда президенттикке талапкер өзүнүн платформасы жөнүндө маалымат берип, сот реформасы, коррупция жана уюшкан кылмыштуу топ менен күрөшүү, экономиканы өнүктүрүү жана турак-жай, жер реформасы жөнүндөгү негизги багыттарын элге маалымдады.
«Өлкөдө олуттуу реформаларды жүргүзүү үчүн мен чет өлкөлөрдө жүргөн билимдүү жаштарды Кыргызстанга чакырам, аларга керектүү шарттарды түзүп берип, өлкөгө кызмат кылууга үндөйм», - дейт Абдил Сегизбаев.
Анын айтымында Кыргызстандын экономикасынын 60 пайызы аткаминерлердин жана депутаттардын колунда көмүскөдө турат. «Эгерде жемкор-аткаминерлердин бирине колуң тургай, тилиң тие турган болсо автоматтык түрдө бардыгы бирдей сага тиш кайрашат. Өз убагында мен 50гө жакын жемкорлорго иш козгоп камадым. Жыйынтыгында алардын душманына айландым. Бирок мен буга таптакыр өкүнбөйм, тескерисинче сыймыктанам. Эгерде менин душмандарым элге кыянат кылган жемкорлор жана уурулар болсо, анда мен өзүмдү түз жолдомун деп эсептейм. Менин максатым - экономиканы көмүскөдөн алып чыгып, бюджетти толуктоо. Ошондо биз пенсияны, врачтар жана мугалимдердин айлыктарын көтөрүп, инвестицияларды жогорулатууга мүмкүнчүлүк алабыз".
Талапкер мындан тышкары калкты социалдык жактан коргоо, пенсияларды жогорулатуу, жумушсуздук көйгөйүн чечүү, сыртта жүргөн мигранттарга колдоо көрсөтүү, балдарды коргоо, аларга туура тарбия берүү тууралуу да ой бөлүштү.
"Кыргызстандан бир мигрант кетсе – аны менен чогуу биз суверенитетибиздин бир бөлүгүн жоготуп жатабыз. Өлкөдөн билимдүү, акылдуу жана күчтүү жаштар кетип жатышат. Бул жол менен улана берсе өлкөдө карылар менен жаш балдар гана калабы?" - дейт талапкер.
Чек ара маселеси тууралуу айтып жатып, бул көйгөйдү тамырынан чечүү үчүн өлкөнү башкарган киши абройлуу болуусу шарт дейт: «Эгер сен өнөктөшүңдүн тилин билбесең эмнени айтып, эмнени чечесиң. Бул багытта мен кошуна мамлекеттер менен достук мамилелерди чыңдайм. Бирок эң башкы орунда биз өзүбүздү өзүбүз сыйлап, сүйлөшүүлөрдүн маалында өзүбүздүн күчүбүздү да көрсөтүшүбүз керек. Ошондо гана тараптардын сүйлөшүүлөрү жемиштүү жыйынтыкталат», - дейт Сегизбаев.
Талапкер мамлекеттик башкаруудагы реформалар жөнүндө айтып жатып, жаңылыктарды жана жаратман ойлорду киргизүү шарт деди. Коом ар бир кызматкер, министр, депутат жөнүндө толук маалымат алышы керек деп эсептейт ал. «Кызматка дайындалып жаткан ар бири жөнүндө маалымат электрондук түрдө болушу керек, ал кишинин ким менен, кайда иштегенин, кандай иштерге аралашканын эл билиши шарт. Ошондо гана коррупционерлер жана уурулар өздөрү эле мамлекеттик кызматтардан четтеп, бардыгы ачык жана айкын болот», - деп түшүндүрдү өз сөзүндө Сегизбаев.
Мындан тышкары, Абдил Сегизбаев аялдарды жана балдарды коргоо, зомбулуктарды алдын алуу көйгөйлөрүнө терең көңүл бөлүп, кеңири токтолду. "Эгер, биз балдарыбызды коргобой, аларга болгон зомбулуктарга көз жумуп койсок, анда бизди кандай келечек күтөт? Мен бул көйгөйгө өзгөчө көңүл бурам, балдарыбыздын башынан бир тал чачы түшпөгөндөй тартипти орнотом", - дейт Абдил Сегизбаев.
Өлкөнүн намысын коргоп, дүйнө жүзүнө атыбызды тааныткан спортчуларга да өзгөчө көңүл бурулуп, алар үчүн эл аралык жана дүйнөлүк спорт аренасында Кыргызстанды татыктуу алып чыккандай кылып бардык шарттар түзүлүшү керек дейт талапкер.
Абдил Сегизбаев жолугушууда сөзүн жыйынтыктап жатып, Кыргызстандын жаркын келечеги үчүн бардык күчтөрдү биригүүгө чакырып, «Келиңиздер, мыйзам чегинде күрөшөлү» - деп билдирди.
Жолугушуу Талас облусунун тургундарынын талапкерге берген жеке суроолору менен уланды. Жыйынтыгында жергиликтүү эл Сегизбаевди колдоп, алдыдагы президенттик шайлоолордо ийгиликке жетишине тилектеш болушту.
Андан кийин президенттикке талапкер Абдил Сегизбаев апасынын кичи мекени Кара-Буура районунун Сулуу-Маймак айылына барып шайлоочулар менен жолугуп, өзүнүн платформасы жөнүндө маалымдап, берилген суроолоруна жооп берди.
Даярдаган мекеме: дареги: Бишкек ш., кардар: Кыргыз Республикасынын Президенттик кызматына талапкер А.К.Сегизбаевдин каржы маселелери боюнча ыйгарым укуктуу өкүлү Нишаев Нурлан Кочурбаевич.
