Жалал-Абад. Өзбекстанда камакта жаткан Ала-Бука районунун 2 тургуну бошотулду

Өзбекстандын Наманган облусунда камакта жаткан Ала-Бука районунун 2 тургуну бошотулду. Муну 3-октябрда Жалал-Абад облустук администрациядан кабарлашты. Кыргыз жарандары 2013-жылдын 1-мартынан бери коңшу өлкөдө камакта жаткан. 1-мартта Ала-Бука районунун Биринчи Май айыл өкмөтүнө караштуу Ак-Башат айылынын 2 улакчысы Наманган облусуна көк бөрү оюнуна катышуу үчүн чакырылат. Барган 2 жигитти өзбек тарап чек араны мыйзамсыз бузуп өттү деп айыптап камакка алышканы белгилүү болду. Бул ишке Жалал-Абад облусунун башчысы Жусубали Торомаматов кийлигишип, улакчылар Ильяз Барпиев менен Каныбек Базарбаев 2-октябрда Өзбекстандан чыгарылды. "Эки тараптуу сүйлөшүүлөрдү жүргүзүп, балдарыбызды аман-эсен чыгарып берүүгө көмөктөшкөнү үчүн облус башчыга жана бардык бийлик, күч органдарына ыраазычылык билдирем",- дейт улакчылардын биринин атасы Лутпидин Базарбаев. Ал эми Ильяз Барпиевдин атасы Сапарбай Барпиев балдарга эч кандай күч колдонулбаганын, ден соолуктары жакшы экенин билдирди.

Автор: Гүлжан Эшбаева