Буга чейин 29-декабрда "Кыргызстан сулуусу-2020" сынагы болуп, анда жеңүүчү деп Лазат Нуркожоева табылып, BMW Х5 унаасын утуп алган. Жеңүүчү кыз президенттик кызматка талапкер болуп жаткан Садыр Жапаровдун карындашы экени айтылып, коомдо ар кандай эки ача пикирди жараткан.
Аталган сынактын жеңүүчүсү Садыр Жапаровдун иниси Давлет Жапаровдун кызы.
SUPER.KG порталы Лазат Нуркожоева менен маектешип, көпчүлүккө кызык болуп жаткан суроолорго жооп алды.
- Сыйлыгыңыз кут болсун, Лазат Нуркожоева! Алгач эле өзүңүз жөнүндө кененирээк айтып берсеңиз.
- Мен 20 жаштамын. Учурда Кыргыз мамлекеттик юридикалык академиясында 2-курста окуйм. Келечектеги юристмин. Ысык-Көл облусуна караштуу Каракол шаарында төрөлгөм, орто мектепти Балыкчыда окугам. Ал эми сынакка катышып калуумдун себеби - ар бир эле кыздын кыялы болсо керек, кичинемден эле мен ханыша болом деп кыялданчумун. Ошентип жүрүп 2016-жылы "Бишкек сулуусу" сынагына катышкам, анда моделдердин ТОП-10дугуна кирип, "ТОП модель Бишкек - 2016" наамын алгам. Ошол күндөн тарта мен өзүмө ишенип, конкреттүү түрдө бир сынакка катышып анын жеңүүчүсү болом деп максат койгом. Бирок дал ушул 2020-жылы утуп алам деп ойлогон эмесмин. Ушул учурга дал келип калды окшойт.
- Сиз жеңүүчү болгондон кийин коомчулукта "Садыр Жапаровдун карындашы" деген кептер айтылып, талкуу болуп жатты. Жообуңуз баарына кызык...
- Садыр атам менин бул сынакка катышканымды билген эмес. Бул сынакка кастинг сентябрь айында башталган. Ал учурда баары билгендей эле Садыр атам абакта болчу. Ал октябрь айында чыкты, ал учурда сынактын жарымына жетип калганбыз. Ал мен жеңип алгандан кийин гана билди. Бул жерде мен утам деп деле ойлогон эмесмин. Жогоруда айткандай, жарым финалга келип калгандан кийин катышууну туура көрдүм. Азыр туугандарыбыздын баары сыймыктанып жатышат. Сынак болуп жаткан күнү атам (ред.: Давлет Жапаров) деле көрбөй эле уктап калыптыр, наам аларымды алар деле күткөн эмес.
- Белгилүү болгондой, сиз таэквандо менен дагы алектенет экенсиз. Канча жаштан бери спорт менен машыгып келесиз?
- 3-классымдан бери машыгып келем. Алдыда спорт менен моделдик жаатты дагы алып кетсем дейм. Ошондой эле "Аалам периси" сынагына катышсам деген максатым жана өз кесибим менен дагы иштесем деген пландарым бар. Спорттон сулуулук тармагына кызыгуум аркылуу эле келип калдым десем болот, атайын деле эч кимден сунуш түшкөн эмес.
- Жеңүүчү аталгандагы сезимдериңиз кандай болду?
- Сынак жүрүп жатканда утам деп ойлоп жаттым, аягында 5 кыз калдык, анан четинен кетип отуруп 2 кыз калдык. Мен утат экенмин деп сездим. Анткени атаандаштарыма караганда видео тааныштыруум өзгөчө болду, талантыбызды көрсөтүүгө 3 мүнөт берилген, башкалар бирден таланттарын көрсөтсө мен 3 талантымды көрсөттүм. Таажыны кийгенде жакшы сезимдер болду. Корккон учурлар да болбой койгон жок, сынакта мага эң оор болгону талантты көрсөтүү болду, ошондон коркуп турдум. Мен анда бир эле номерде 3 кийим кийдим, үлгүрүп калсам экен деп кыжаалат болдум. Ал эми подиумда болсо 2016-жылдан бери басып келем, андан сарсанаа деле болгон жокмун.
