"Акчага болгон сүйүүңүз кандай?" Депутат Зарылбек Рысалиев Улукбек Мариповго дагы кандай суроолорду берди?

Бүгүн, 1-февралда Жогорку Кеңештин көпчүлүк коалициясында премьер-министр кызматына Улукбек Мариповдун талапкерлиги каралып жатат.

Депутат Зарылбек Рысалиев Мариповдон "Сиз өзүңүздү күчтүү кадр катары сезесизби?" деп сурады.

Улукбек Марипов: "Мен кандай кадр экенимди сиздер баалайсыздар. Менин ниетим күчтүү", - деди.

Рысалиев: "Сиз баштаганда эле Финансы министрлигинен, президенттик аппараттан, Эсептөө палатасында иштегенсиз. Мындан улам суроо жаралат. Акчага болгон сүйүүңүз кандай?" - деп сурады

Марипов: "Менин акчага сүйүүм жок" деп жооп берди.

Депутат: "Атаңыздын күчүн колдонуп жаткан жоксузбу?" деп сурады.

Марипов: "Мен атам берген тарбия менен сыймыктанам, балдарымды дагы ошентип өстүрсөм деген тилегим бар. Бардык кызматта өзүмдүн принцибим менен иштеп келгем", - деди.

Рысалиев: "Садыр Жапаров башынан кыйынчылык өткөргөн. Сиздин башыңыздан кыйынчылык өтө элек. Дайыма курсагыңыз ток экен. Сиз кандай иштей аласыз. Ачыгын айтсам сизге ичим чыкпай жатат", - дейт.

Марипов: "Мен мактаган кишиден корком, критика айткан адамды жакын адам катары сезем", - деп жооп берди.