Эльвира Сурабалдиева: "4-февраль иштегениме 100 күн болот, документтерди тапшырып, кетүүгө даярданып жатам"

Кечээ, 2-февралда Жогорку Кеңештин тармактык комитетинде Улукбек Марипов сунуштаган өкмөттүн жаңы түзүмү каралды. Марипов сунуштаган тизмеде Эльвира Сурабалдиеванын аты аталган жок.

Ал эми өкмөт башчылыкка Мариповдун өзүнүн талапкерлиги 1-февралда көпчүлүк коалиция тарабынан каралып, жактырылган.

Социалдык тармактын кээ бир колдонуучулары Сурабалдиеванын жаңы өкмөттүн курамындагы тизмесинде жок экенин таң калуу менен кабыл алышса, кээ бирлери кадыресе эле күтүлгөн жыйынтык экенин жазып жатышат.

Ал эми Сурабалдиева буга чейин да бул кызматта убактылуу экенин билгенин жана ага нааразычылыгы жок экенин билдирген.

Сурабалдиева бул билдирүүсүнө улай эле 4-январда бул кызматта иштегенине 3 ай боло турганын жана отчётту сөзсүз жеке баракчасына жарыялай турганын жазды.

"Документтерди тапшырып, кечээтен бери иш кагаздардын аягына чыгып жатамын. 4-февраль иштегениме 100 күн болот экен, отчетту бул жерге сөзсүз чыгарамын. Жүрөгүм тынч, бир кыйла жеңилдегендей сезимде кетип жатамын, - коронавирус боюнча кырдаалга жоопкерчиликти көтөрүү оор болуп жатты. Ковид-19 менен күрөшүү, республикалык штабдын жетекчилигин бүгүн Саламаттык сактоо министрлигине тапшырып беремин.

Мени колдоп, жардам берип жаткандарга да, ишимди сындап, катуу талаптарды койгон ар бириңиздерге чын дилимден ыраазычылык билдиремин - чоң кызматтын жоопкерчилиги да оор болот. Оор кырдаалда вице-премьер-министрликке дайындалып келгенмин. Ал кезде убактылуу мөөнөттөгү экендиги алдын-ала сүйлөшүлгөн эле. Эч нерсеге кейибеймин", - деп жазды Сурабалдиева.

Автор: Гүлшат Ысамамат кызы