2-февралда "Роза Отунбаеванын демилгеси" эл аралык коомдук фонду тарабынан "Коомдун тынчтыкта жана инклюзивдүү өнүгүүсү үчүн миграцияга кабылган аялдардын жана кыздардын укуктарын жана мүмкүнчүлүктөрүн кеңейтүү" долбоорунун алкагында маалымат каражат өкүлдөрүнө арналган иш-чара өттү. Иш-чарага 30га чукул журналист катышты. Уюштуруучулардын айтымында, иш-чаранын максаты маалымат каражат өкүлдөрүнүн аялдар миграциясы жаатындагы кырдаалга, мигрант аялдардын коомду өнүктүрүүдөгү жана тынчтыкты куруудагы позитивдүү ролу жөнүндөгү маалымдуулугун жогорулатуу болуп саналат.
Фонддун аткаруучу директору Доктургүл Кендирбаева иш-чара учурунда өлкөгө салым кошкон аялдардын эмгегинин көмүскөдө калып кетип жатканы тууралуу айтты. Айтымында, кор болгон, кордолгон коомдо - эне баласына сүйүү жана мээрим бере албайт. Ошондуктан аялдын эмгеги коомдо бааланышы керек. Мындан улам ал чет жактан жакшы билимге ээ болуп келип, өзү жашаган айылдын өнүгүүсүнө чакан иш баштап, салым кошкон аялдардын саны көп экенин баса белгиледи.
"Пандемия учурунда дээрлик калктын калың катмарына жардам бергендер да врач айымдар болду. Ошондой эле Орусиядагы диаспора жетекчилеринин көбү айымдар экен. Алар чоң долбоорлорду уюштурду жана азыр да иштеп жатышат. Бирок мамлекет тарабынан, коом тарабынан алардын жасалган эмгектери айтылбай, көмүскөдө калып жатат. Ал аялдар ар кандай тагдыр менен кетишип, бирок ошол миграциянын бороонун жеңип чыгып, азыркы тапта да айылдарын өнүктүрүп, ынтымакты да бекемдеп, өлкөнүн өнүгүшүнө ири салымдарын кошуп жатышат. Албетте биз бул багытта иштеп жатабыз. Негизи сыртта жүргөн аял мигранттар көп, бирок статистикага таяна турган болсок, өлкөгө 2,5 миллиард мигранттар тарабынан акча которула турган болсо, ошонун 50 пайызын аялдар которот экен. Бирок ушул мезгилге чейин эмнегедир коом толук энелердин абалы, алардын шарттары жана түзгөн система, салымдары тууралуу айтпай келишет", - деди Кендирбаева .
Ошондой эле иш-чарада "Роза Отунбаеванын демилгелери" фонду сунуш кылган долбоордо Кыргыз өлкөсүндөгү алты айыл сыналуучу аймак катары тандалып алынганы тууралуу маалымат айтылды. Ага - Ош облусунун Төөлөс, Бей айылдары, Баткендин Ак-Турпак, Орозбек айылдары, Жалал-Абаддын Кызыл-Туу айыл аймагы жана Талас облусунун Кара-Буура айылы кирген.
Бул айылдарда миграциянын агымы өлкөнүн башка аймактарына салыштырмалуу жогору деп табылган. Алардын ичинде балдарын туугандарына таштап, көр-тириликтин айынан миграцияга сиңип кеткен аялдардын саны арбын.
Өз айылынын, өлкөнүн өнүгүүсүндө мигрант айымдар чоң салым кошуп келишет. Алардын алдына балдарына болгон кусалык, калыптанып калган стереотиптер жана башка көптөгөн кыйынчылыктар чыгат. Мигрант айымдардын салымын таануу менен коомдун өнүгүүсүнө мындан да көп салым кошууга тең шарт түзүү зарыл.
Төмөнкү тасмада Гүлбахар Алиева миграциядан келгенден кийин чакан тигүү цехин ачып, айылдаштарына тигүүчүлүктү үйрөтүп жатканы чагылдырылат.
Иш чара “Коомдун тынчтыкта жана жаратмандыкта өнүгүүсү үчүн миграцияга кабылган аялдардын жана кыздардын укуктарын жана мүмкүнчүлүктөрүн кеңейтүү” долбоорунун алкагында уюштурулду.
Долбоор БУУнун Тынчтыкты куруу фондунун каржылык колдоосунда “Роза Отунбаеванын демилгеси” Эл аралык коомдук фонду тарабынан БУУнун Миграция боюнча Агенттиги, Миграция боюнча Эл аралык уюму, БУУ-Аялдар жана Эл аралык Эмгек уюму, Жамааттарды өнүктүрүү боюнча Альянсы жана Тренерлер жана консультанттар Бирикмеси менен биргеликте жүзөгө ашырылып жатат.
Журналисттер менен жолугушуу бейформал тартипте өттү. Аларга жооптуу адистер аталган долбоор алкагындагы ишмердиктери тууралуу кенен-кесир айтып беришти.
Белгилей кетсек, "Роза Отунбаеванын демилгеси" эл аралык коомдук фонду – бул коммерциялык эмес, өкмөттүк эмес уюм. Ал өлкөнүн социалдык, саясий, экономикалык өнүгүшүнө, ошондой эле Кыргыз өлкөсүндө курчап турган чөйрөгө карата аяр мамилеге салым кошууга, кудуреттүү программаларды жана долбоорлорду демилгелөө жана ишке ашыруу максатында 2012-жылдын январында түзүлгөн.
