Мектеп директорлорун конкурстук негизде кызматка дайындап, ар беш жыл сайын аттестациядан өткөрүп туруу мыйзам долбоору сунушталды. "Билим берүү жөнүндө” Кыргыз Республикасынын мыйзамынын долбоору 2021-жылдын 26-январынан тарта коомдук талкууга коюлду.
Долбоордун демилгечилери Жогорку Кеңештин депутаттары Жанар Акаев, Абдывахап Нурбаев, Наталья Никитенко, Дастан Бекешев жана башкалар.
Демилгечи депутаттар мындай жол менен билим берүү системин жакшыртуу максатын көздөп жатканын белгилеп жатышат.
Мыйзам долбоорунун максаты мамлекеттик жана муниципалдык билим берүү уюмдарынын жетекчилерин тандоо жана кесиптик ишмердүүлүгүн баалоо тутумун жакшыртуу болуп саналат.
Демилгечи топтун баш сабында турган Абдывахап Нурбаев мыйзам жогорку окуу жайлардын ректорлоруна эмес, мектеп директорлоруна тиешелүү экенин SUPER.KG порталына билдирди.
"Учурда мектеп директорлору түз эле дайындалат. Биз алгач кесипкөйлүгүнө ынануу үчүн конкурс аркылуу тандап алууну сунуштадык. Аны менен катар ар беш жыл сайын мектеп жетекчилерин аттестациядан өткөрүүнү демилгеледик. Бул жетекчилердин кесиптик квалификациясын жогорулатууну стимулдаштырууга шарт түзөт жана билим берүү системасына оң таасирин берет. Мыйзам долбоорун Билим берүү министрлигинин эксперттери менен биргеликте даярдадык", - деди Нурбаев.
Дал ошол Нурбаев айткан эксперттик топтун катарына кирген билим берүү жана илим министри Алмазбек Бейшеналиевдин кеңешчиси Догдүргүл Кендирбаева директорлук кызмат саясатташып кеткенин айтып, бул долбоор көп талкууланганын айтты.
"Аттестациялоого толугу менен катышып, анын долбоорун иштеп чыгып, эксперттик топ сунуштарыбызды бердик. Анткени бул өтө керек нерсе. Мисалы, телефон, компьютерди деле карасаңыз биринчи чыккандарын биз колдонбой элебиз, азыр ал техникалардын, балким, онунчу мууну иштеп жатат. Мындан улам 5 эле жылда эмне деген өзгөрүүлөр болууда. Мында аттестациядан өткөрүүнүн бир максаты "сен кал, сен кет" деп отурбайсың. Аттестациядан өткөн директордо жыйынтык жок болсо, ал кызматынан кол жууйт. Бул жерде тесттер да ортомчусуз түзүлөт, ал кадимки ЖРТ сыяктуу. Аны эч кандай статс-катчы же район, же дагы башка тараптар кабыл албайт. Биз мугалимдер менен сүйлөшкөндө, мектеп директорлору, дегеле райондук же облустук администрациянын кызматкерлерин алардын эмгектерин баалаганга киргизбөөнү суранып жатышат. Эмне үчүн десек, алар "тээтиги мугалимди ал, бул директорду кой" деп айтып, буйрук бергендер көп болот деген жүйөөнү келтиришти. Биз ошонун баарын эске алуу менен онлайн тестирлөө кылганы жатабыз. Ошондо ал директор 5 жыл иштейби, 10 жыл иштейби эгер жыйынтык бербесе, ал кызматтан кетет. А балким ал кызматкер пенсияга чыгып, укмуш иштесе ордунда кала берет. Директорлук кызмат да чынында саясатташып кеткен. Анткени аларды ар бир партия менчиктеп, саясий мобилизация кылып, шайлоо мектепсиз өтчү эмес. Ошентип отуруп биз мугалимдердин баркын кантип кетирип алганыбызды билбей калдык", - деди Кендирбаева.
Конкурстун жана аттестациялоонун жол-жобосун иштеп чыгуу өкмөттүн компетенциясына кирет.
“Билим берүү жөнүндө”
Кыргыз Республикасынын Мыйзамына өзгөртүү киргизүү жөнүндө
1-берене.
“Билим берүү жөнүндө” Кыргыз Республикасынын Мыйзамына (Кыргыз Республикасынын Жогорку Кеңешинин Ведомосттору, 2003-ж. №8, 323-б.) төмөнкүдөй өзгөртүүлөр киргизилсин:
1) 1-берененин 1-бөлүгү төмөнкүдөй редакцияда сегизинчи абзац менен толукталсын:
“Кыргыз Республикасынын билим берүү уюмдарынын жетекчилерин аттестациялоо – алардын кесиптик компетенттүүлүгүн, билим берүү уюмдарын эффективдүү башкаруу деңгээлин аныктоо боюнча мезгил-мезгили менен өткөрүлүп туруучу процедура;”;
2) 38-берене төмөнкүдөй редакцияда 4-бөлүк менен толукталсын:
“Мамлекеттик жана муниципалдык билим берүү уюмдарынын жетекчилерин дайындоо (мамлекеттик жогорку окуу жайларынын жетекчилеринен тышкары) Кыргыз Республикасынын өкмөтү тарабынан бекитилген тартипке ылайык конкурстук негизде жүргүзүлөт”.
V глава төмөнкүдөй редакцияда 381-берене менен менен толукталсын:
“381-берене. Мамлекеттик жана муниципалдык билим берүү уюмдарынын жетекчилерин аттестациялоо.”
Мамлекеттик жана муниципалдык билим берүү уюмдарынын жетекчилери ар беш жыл сайын аттестациядан өтөт. Аттестация Кыргыз Республикасынын билим берүү жаатындагы ыйгарым укуктуу органы тарабынан өткөрүлөт.
Мамлекеттик жана муниципалдык билим берүү уюмдарынын жетекчилерин аттестациялоону жүргүзүү тартиби Кыргыз Республикасынын Өкмөтү тарабынан аныкталат”.
2-берене.
Ушул Мыйзам расмий жарыяланган күндөн тартып он күн өткөндөн кийин күчүнө кирет.
Ушул Мыйзам күчүнө киргенге чейин дайындалган Мамлекеттик жана муниципалдык билим берүү уюмдарынын жетекчилери ээлеген кызматына дайындалган убактысына карабастан аттестациядан өтөт.
Кыргыз Республикасынын Өкмөтү алты айлык мөөнөттө өзүнүн ченемдик-укуктук актыларын ушул Мыйзамга ылайык келтирсин.
