Мурдагы өкмөт башчы Сапар Исаковдун Фейсбукта баракчасы пайда болду. Анда Исаков Орусиянын Москва шаарында экенин белгилеп, бир канча пост жазган.
Акыркы посту "Урматтуу мекендештерим! Эртели кеч чындык жарк этип такталат, мен ишенем, сөзсүз акыйкат орнойт",- деп жазылат постто.
Бул баракча Сапар Исаковго тийиштүүбү деген суроо менен жактоочусу Замир Жоошевге байланыштык. Жоошев эч кандай маалыматы жок экенин айтып, тактап көрөрүн кошумчалады.
Ал эми Жазаларды аткаруу мамлекеттик кызматы бул боюнча маалымат тарата элек.
Азырынча бул баракча Сапар Исаковдуку экенин эч бир тарапташы же жакындары тактай элегин эскерте кетебиз.
Сапар Исаков менен Бишкек шаарынын мурдагы мэри Албек Ибраимовго эл аралык издөө жарыяланган. Сапар Исаков менен Албек Ибраимов 5-октябрда шайлоонун жыйынтыгына нааразы болуп чыккан митингчилер тарабынан бошотулган. "Үй-бүлөлүк себептерден улам жети күнгө" деген жазуу менен бошотулган Сапар Исаков менен Албек Ибраимов Жаза аткаруу мамлекеттик кызматына 2020-жылдын 13-октябрында келиши керек болчу. Бирок ушул күнгө чейин анын кайда экендиги тууралуу маалымат жок.