Абактагы орусиялык оппозиционер Алексей Навальный ачкачылык жарыялады

Абактагы орусиялык оппозиционер Алексей Навальный ачкачылык жарыялады. Бул тууралуу Навальныйдын социалдык тармактагы баракчасына жазылды.

Маалыматка ылайык, ал дарыгер чакырылмайынча тамак ичпей турганын түшүндүргөн. "Дарыгерди чакырып, дары-дармек алууга укугум бар. Белдин оорушу бутка өттү. Оң жана азыр сол бутум сезгичтигин жоготту", - деп жазды ал.

Белгилей кетсек, орусиялык оппозициячыл Алексей Навальный 17-январда Берлин шаарынан Москвадагы "Шереметьево" аэропортуна учуп келери менен кармалган. Андан соң анын камалышын сот мыйзамдуу деп тапкан. Көп өтпөй Алексей Навальныйга карата сот 3 жарым жылга кесүү чечимин чыгарган.

Учурда Алексей Навальный Орусиянын Владимир облусундагы колонияда. Жактоочусу Ольга Михайлова жергиликтүү басылмаларга анын ден соолугу начарлап кеткендигин билдирген.

Автор: Жылдыз Джускембаева