Таттуу суусундуктар балдардын эс-тутумун начарлатат

Таттуу кошулган суусундуктар балдардын эс-тутумун жана окуу жөндөмүн начарлатат. Мындай тыянакка АКШнын Жоржия жана Түштүк Калифорния университеттеринин илимпоздору изилдөөлөрдү жүргүзгөндөн кийин келишкен. Бул тууралуу чет элдик басылмалар жазышты.

Маалыматка ылайык, эксперттер чычкандарга бир катар эксперименттерди жүргүзүп, кичине кезинен тарта сууну шекер менен ичкен кемирүүчүлөрдүн эс-тутумунда көйгөйлөр көп кездешерин аныкташкан.

Мындан тышкары, таттуу суусундуктардын көптүгүнөн жаныбарларда ичеги-карын бактерияларынын курамы өзгөрүлүп, бул өз кезегинде алардын мээсинин иштешине терс таасирин тийгизген.

Келечекте илимпоздор адамдар таттуу суусундуктардан баш тартса ден соолугу жакшырабы же мурдагы абалында эле калабы деген суроолорго жооп издешет.

Автор: Айзада Кыдырмышева