Жалал-Абадда курорттук зонада жылкыларын жайып жүргөн адам изделүүдө

Жалал-Абад курортунун аймагында жылкыларын жайып жүргөн адам изделүүдө. Бул тууралуу шаардык мэриянын басма сөз кызматынан билдиришти.

Маалыматка ылайык, Жалал-Абад курортунун аймагында үйүрү менен жайылып жүргөн жылкылардын ээси изделүүдө. Жылкылар мисте токоюн аралап, бак-дарактарга зыян келтирген. Ал тургай унаа жүрүүчү жолго чейин чыгып, каттамга да ыңгайсыздык жаратышкан.

"Курортту жайыт катары пайдаланып, жылкыларын кароосуз калтырган ээсине 3 миң сомдон 7 жарым миң сомго чейин айып пул салынат. Учурда бул боюнча милицияга кайрылуу түштү. Андан тышкары жаз мезгилинде куроротко эс алууга чыккан жарандарды аяр мамиле кылууга чакырабыз. Айлана-чөйрөнү таза кармап, эс алуудан соң таштандыларды, буюмдарды ала кетиңиздер", - деп айтылат билдирүүдө.

Автор: Айзада Кыдырмышева
Фото: Жалал-Абад шаардык мэриясы