Орусияда шаардык кеңештин депутаттарына таандык унааларды өрттөп кетишти

13-апрелге караган түнү Орусиянын Амур облусунун Белогорск шаарында белгисиз адамдар 2 унааны өрттөп жиберишкен. Унаалар шаардык кеңештин депутаттарына таандык болгон. Бул тууралуу орусиялык басылмалар жазып чыгышты.

Маалыматка ылайык, аталган өлкөнүн Өзгөчө кырдаалдар министрлигине кырсык тууралуу билдирүү жергиликтүү убакыт боюнча 13-апрелге караган түнү саат 3:23 чамасында түшкөн. Жерине тогуз өрт өчүрүүчү жана эки техника жөнөтүлгөн.

Амур облусунун прокуратурасы эки унаа тең Белогорск шаардык кеңешинин депутаттарына таандык экендигин билдирген. Орусиянын Кылмыш-жаза кодексинин 167-беренесинин 2-бөлүгүнүн (мүлктү атайылап өрттөп жок кылуу) негизинде кылмыш иши козголгон. Учурда тергөө иштери жүрүп жатат деп жазылат маалыматта.

Автор: Алина Айдарбекова