Уу коргошундан дагы бир адам ууландыбы? Тийиштүү мекеменин жообу

Жергиликтүү маалымат каражаттарынын биринде уу коргошун (аконит) менен дагы бир жаран ууланып, Бишкектеги травматология жана ортопедия илим изилдөө борборунун түштү деген маалымат жазылды. Бул маалыматты тактоо максатында аталган оорукананын маалымат кызматына байланышканыбызда, төмөнкүлөрдү билдирди.

"Биздин ооруканага аконит менен ууланып эч кандай бейтап түшкөн жок" деп билдиришти аталган ооруканадан.

Окуянын чоо-жайы:

Буга чейин өлкө башчысы Садыр Жапаров өзүнүн социалдык тармактагы баракчасына дарыгерлер коронавирустан 2-3 күндө айыктырып чыгара турган ыкма табышканын билдирген. Бул боюнча жазылган постко адамдар сыртына "уу коргошун" деп жазылган бөтөлкөлөргө суюктукту куюп жаткан видео тиркелген.

16-апрелде саламаттыкты сактоо министри Алымкадыр Бейшеналиев маалымат жыйын өткөрүп, уу коргошун менен дарылоо боюнча түшүндүрмө берип, аталган өсүмдүктүн кайнатмасын түз эфирде ичкен. Бул коомчулукта ар кандай талкууларды жаратып, мындай дарылоо ыкмасына көпчүлүк сын-пикирин айтууда.

20-апрелде 3 бейтап оор абалда ооруканага түшкөнү, алар уу коргошунга ууланганы маалымдалган.

Автор: Айжанар Рыспек кызы