"Арасында ымыркай бар". Бишкек-Нарын-Торугарт унаа жолундагы кырсыктан каза болгондордун саны 7ге жетти

Буга чейин Бишкек-Нарын-Торугарт унаа жолунун Кубакы ашуусунда жол кырсыгы катталып, 5 адам каза болгону кабарланган. Көп өтпөй кырсык Хово үлгүсүндөгү оор жүк ташуучу унаанын тормозу иштебей калгандан улам келип чыкканы маалымдалган.

Өзгөчө кырдаалдар министрлигинин маалымат кызматынан билдиргендей, Кочкор райондук ооруканасына жаткырылгандардын ичинен 2 адам, тагыраагы 1 ымыркай жана 74 жаштагы киши каза болду.

Муну менен жалпы 23 адам жол кырсыгына учурап, анын ичинен 7 адам каза болду. Учурда жабыркаган жана каза болгон жарандардын аты-жөндөрү такталууда. Жеринде 4 куткаруучу иш алып барууда.

Эскерте кетсек, акыркы маалыматтар боюнча, кырсыктын кесепетинен 5 жаран жеринде каза болуп, 14 адам жабыркаган.

Автор: Гүлзина Каныбекова
Фото: Өзгөчө кырдаалдар министрлигинин маалымат кызматы