Футбол: Кыргыз курамасы Палестинаны 1:0 эсебинде жеңди (онлайн)

Оюн калысы ышкырыгын жаңыртты. Кыргыз курамасы Палестина менен болгон оюнда 1-0 эсебинде жеңишке жетишти. Беттештеги жалгыз голду 1-бөлүктө жарым коргоочу Азим Азаров киргизген.

Оюндун акыркы мүнөтү аяктап баратат.

Калыс беттешке 3 мүнөт убакыт кошуп берди.

"Ак шумкарларда" орун алмаштыруу бар. Гүлжигит Алыкуловдун ордуна Темирболот Апаев талаа үстүнө чыкты.

Оюндун негизги убактысынын бүтөрүнө 1 мүнөт гана убакыт калды. Эсеп өзгөрүүсүз 1:0 боюнча. "Ак шумкарлар" алдыда келе жатат.

Гүлжигит Алыкулов бир оюнчуну жазгырып өтүп дарбазага кубаттуу сокку жасады. Бирок топ коргоочулардын бутуна тийип, дарбазага жетпей калды.

Палестиналыктар дарбазадан кыйла алыс тарапка сокку узатышты.

"Ак шумкарлардын" катарында жалгыз голун ээси Азим Азаров жана Фархат Мусабековдун ордуна Бактияр Дүйшөбеков менен Одилжан Абдрахманов чыкты.

Оюн кызуу уланууда. Азырынча эсеп саны өзгөрө элек. Кыргыз өлкөсү 1 упай менен алдыда.

Палестиналыктар "Ак шумкарлардын" дарбазасы жана гол киргизип кетүүгө өтө жакын барышты. Бирок коргоочулар топту алыстатууга жетишти.

Фархат Мусабековго каршы оюн эрежеси бузулду.

Кыргыз футболчуларында алмаштыруу бар. Абай Бөкөлеев талаа үстүнө чыкты.

Стандарттык абал "Ак шумкарлардын" аткаруусунда болуп өттү. Топко биринчилерден болуп жеткен Эрнис Батырканов топко ээлик кыла алган жок.

Дагы бир жолу Алимардон Шүкүровго каршы оюн эрежеси бузулду. Шүкүровго доктурлар жардам көрсөтүүдө.

"Ак шумкарлар" бурчтан чыгарып берүү жасашты.

Палестиналыктар кезектеги стандарттык абалдан топту көтөрүп беришти. Бирок бул жолу да аракети натыйжасыз болуп чыкты.

Палестиналык футболчулар бурчтан чыгарып берүүнү ишке ашырышты. Коргоочулар кайрадан топту дарбазадан алыстатышты.

Гүлжигит Алыкулов дарбазачыны жазгырып өтүп кете жаздады. Бирок андан соң коргоочулар тоскоолдук жаратып, топ оюн талаасынан чыгып кетти.

Стандарттык абалды Фархат Мусабеков аткарды. Түз эле дарбазага сокку узатып көрдү. Бирок топ бир топ эле жогору тарапка кетти.

Палестиналыктар эки оюнчусун алмаштырды.

Алимардон Шүкүровго каршы дагы бир ирет оюн эрежеси бузулду. Ал чабуулга кирип бара жаткан. Атаандаштар калыс менен макул эместигин билдиришүүдө.

Палестиналык футболчу Мухаммед Дарвиш Турсунали Рустамовго каршы орой оюн өткөргөн үчүн сары айып кагазын алды. Бул оюндагы алгачкы айып кагазы.

Эрнис Батырканов Алимардон Шүкүровдон келген топко жетпей калды. Ага чуркап чыккан атаандаштардын дарбазачысы тоскоолдук жаратты.

Кайрат Жыргалбек уулу бир оюнчуну жазгырып өтүп, сокку узатты. Бирок топ дагы бир ирет үстүңкү мамыдан ашып кетти.

Турсунали Рустамовго каршы атаандаштардын талаасында оюн эрежеси бузулду.

Оюн уланууда. Азырынча эсеп саны Кыргыз өлкөсүнүн пайдасына 1:0. Ал эми палестиналыктар дагы бир ирет "Ак шумкарлардын" дарбазасына сокку узатты. Бирок топ үстүңкү дарбаза мамысынан жогору кетти.

Палестиналык футболчунун көтөрүп берген тобу жыйынтык берген жок.

Палестиналык оюнчулардын бирине каршы оюн эрежеси бузулду. Алар стандарттык абалды аткарышат.

Палестиналыктар бурчтан чыгарып берүүдө аз жерден гол жаратып коё жаздашты.

"Ак шумкарлар" чабуулда. Турсунали Рустамовдун чыгарып берүүсү аягына чыккан жок.

"Ак шумкарлар" бурчтан чыгарып берүүнү аткарышты. Бирок каршылаш коргоочулар гол киргизүүгө жол берген жок.

Алимардон Шүкүров стандарттык абалдан сокку жасап көрдү. Бирок таамай багытталган жок.

Гүлжигит Алыкуловго каршы айып аянтчасынын жанында эреже бузулду.

Алимардон Шүкүров атаандаштардын дарбазасына укмуштуудай сокку жасады. Бирок тилекке каршы топ дарбаза мамысын кыйгап өтө берди.

Палестиналыктар бурчтан чыгарып берүүнү аткарышты. Бирок коргоочулар топту алыстатты.

Оюндун биринчи бөлүгү аяктады. Командалар 15 мүнөттүк эс алууга чыгышты. Эсеп 1-0. Азырынча "Ак шумкарлар" алдыда.

Палестиналыктар экинчи кабаттан ойноого аракет жасап топту айып аянтчасына көтөрүп берип, гол киргизүүгө аракет кылышты.

Алимардон Шүкүров айып аянтчасынын сыртынан сокку жасады. Тилекке каршы тепкен тобу дарбазанын үстүңкү мамысынан ашып кетти

Гүлжигит Алыкулов сокку жасап көрдү. Бирок бир аз кубатсыз болуп калгандыктан дарбазачы оңойлук менен тосуп алды.

"Ак шумкарлар" атаандаштардын коргоочуларын жазгырып өтүүгө аракет кылышууда. Топко ээлик кылуу дегендик бирдей көрсөткүчтө.

Эки тарап чабуул уюштуруу аракетин көрүп, кыска пастар менен оюн уланууда.

"Ак шумкарлар" эсепти ачты. Жарым коргоочу Азим Азаров Палестинанын дарбазасына алгачкы голду киргизди. Эсеп 1:0. Кыргыз өлкөсү алдыга чыкты.