Токтогулда күйүүчү май ташуучу унаа менен Жигули ВАЗ-2107 унаасы сүзүшүп, 3 жаран каза болду

Жалал-Абад облусунда жол кырсыгынан 3 адам каза болду. Бул тууралуу ӨКМнын басма сөз кызматынан билдиришти.

Маалыматка ылайык, бүгүн, 15-сентябрь күнү саат 07:10 чамасында Токтогул районунун Торкент айыл аймагынын Кара-Жыгач айылында MAН үлгүсүндөгү күйүүчү май ташуучу унаа менен Жигули ВАЗ-2107 унаасы сүзүшүп, кырсыктын кесепетинен Жигулидеги бара жаткан 3 эркек киши окуя болгон жерде каза болду.

Токтогул району боюнча куткаруу кызматынан 5 куткаруучу тартылып, Жигули унаасында кыпчылып калган 3 жаранды чыгарып, милиция кызматкерлери менен биргеликте "Тез жардам" унаасы менен Токтогул райондук ооруканасына өткөрүп беришкен.

Учурда каза болгон жарандардын аты-жөнү такталууда.

Автор: Айсалкын Качкынбекова