Бишкекте көп кабаттуу үйдүн батирлеринин эшиктерин тепкилеп, жашоочулардын тынчын алган жаран кармалды

Бишкектин Чыгыш-5 кичи районундагы Армейский көчөсүндө жайгашкан көп кабаттуу үйлөрдүн биринде 2 күндөн бери эшиктерди такылдатып, ызы-чуу кылып тургундардын тынчын алып жатат делген жаран кармалды. Бул тууралуу Биринчи Май РИИБинин басма сөз кызматы билдирди.

Маалыматка ылайык, жашоочулардын тынчын алып жаткан жаран эч кандай психикалык жактан жабыркабайт. Ашыкча алкоголдук ичимдик ичип алгандыктан ызы-чуу салып жатканы аныкталгандыгы айтылат билдирүүдө. Учурда ал убактылуу кармоочу жайга киргизилди.

Буга чейин социалдык тармактарда Чыгыш-5 кичи районундагы көп кабаттуу турак үйлөрдүн биринде эшиктерди ургулап, ызы-чуу салып тургундардын тынчын алып жаткан жарандын видеосу тараган. Видеодон ал адамдын туш келди эшиктерди тепкилеп, кыйкырык салып жатканын көрүүгө болот.

Ал эми аталган аймактагы жашоочулардын айтымында, ал оозго алгыс сөздөрдү айтып, ызы-чуу сала берген. Аны тынчтандырганга аракет кылган жарандарга да көнгөн эмес. Мындан улам тургундар коопсуздук үчүн милиция кызматкерлерине билдирүүгө аргасыз болушкан.