Бишкекте 6 баланын энеси СИЗО-1ге камакка алынып, балдары кароосуз калды. Жактоочу Канат Хасанов жалгыз митингге чыкты

Бүгүн, 1-октябрда саат 21:00 чамасында жактоочу Канат Хасанов Бишкек ШИИББинин алдына митингге чыкты. Анда ал "алдамчылык" фактысы менен кармалган 6 балалуу 41 жаштагы аялдын СИЗО-1ге камалганына нааразы. Тактап айтканда, ал учурда камакта жаткан Асыла Талипованын ишине жактоочулук кылууда.

"Асыла Талипованын 6 баласы бар. Улуусу 12, кичүүсү 2 жашта. Ал алдамчылык фактысы менен кармалган. Бирок ал баш коргоо чарасы каралып, үй камагына чыккан. Буга чейин келинге карата 6 арыз жазылган. Бирок алар менен эсептешип бүткөн эле.

Себеби ал курулуш компаниялардын биринин жетекчиси. Пандемия учурунда бир аз иштери чыгып аны бүтүргөн. Алардын ичинен 18 миң 500 доллар карызы калган. Бирок ал карыздын жарымын четинен төлөп баштаган. Бирок 2 айлык үй камагында жүргөн убакта аны милиция кызматкерлери чакырып алып, андан соң камакка алышкан.

Аны алгач Октябрь РИИБинде кармап, көрсөтмө берүүсүн талап кылышкан, кээ бир документтерге кол койдурганга аракет кылышкан. Тергөө кызматы алар жалгыз бой эне экенин айтып, балдарын интернатка алып коёбуз деп коркутушкан.

Октябрь РИИБинде кызматкерлер арасында баш аламандык болуп жатат. Аларга бул себеп болуп, аны колдонушууда.

Азыр келиндин балдарын кошуналары карап жатат. Мен барып кабар алып, азык-түлүк жеткирип келдим. Кичүү баласы дене табы көтөрүлүп ыйлап жатат. Бул эмне деген шумдук?! Силер түшүнүп жатасыңарбы?! Келиндин жолдошу жок. Ал 6 баланы жалгыз багып келе жаткан. Алар азыр кароосуз калды. Балдарды карай турган жакындары жок. Ошондуктан мен митингге чыктым. Себеби келинге абдан оор болуп турат.

Мындан улам мен Бишкек ШИИББинин алдына жалгыз митингге чыктым. Октябрь РИИБинин жана Бишкек ШИИББинин башчысына, ошондой эле президент Садыр Жапаровго кайрылам. Бул ишти жеке көзөмөлгө алып карап берүүлөрүн суранам", - деди Канат Хасанов.

"Мага Бишкек ШИИББинин башчысы Азамат Ногойбаев митингге чыкпашымды суранды. Мен баш тарттым. Себеби балдардын эртеңкисине ким жооп берет? Мен ИИМдин жетекчилиги буга реакция кылып, ишти жеке көзөмөлүнө алат деп ойлойм", - деди Хасанов.