Равшан Жээнбековдун ден соолугу начарлап, медициналык кароодон өткөрүлдү

Учурда убактылуу камакта отурган Равшан Жээнбеков ден соолугу начарлап, медициналык көзөмөлдөн өттү. Бул тууралуу анын уулу Азат Равшанга байланышканыбызда билдирди.

Анын айтымына караганда, Равшан Жээнбеков боор оорусу менен жабыркап жатат.

"Бүгүн атама ооруканадан медициналык кароо өткөрүлдү. Атамдын боору жабыркап жатканын дарыгерлер айтып жатышат. Биз дагы анализдерди тапшырып, дагы тактаганга аракет кылып жатабыз", - деп билдирди Азат Равшан.

Маалымат үчүн:

Белгилей кетсек, 5-августта Равшан Жээнбековдун баш коргоо чарасы өзгөртүлүп, 2 айга камакка алынган. Баш коргоо чарасы өзгөртүлгөнү Кой-Таш окуясына байланыштуу экендигин анын жактоочусу Замир Жоошев билдирген.

Ошондой эле саясатчы бир мандаттуу округдан шайлоого аттануу үчүн кароол менен келип Борбордук шайлоо комиссиясына арыз тапшырган.