Баткендеги соңку кырдаал. Кооптуу аймактардан жалпы 11 миңден ашык адам эвакуацияланды

Кыргыз-Тажик чек арасындагы ок атышуудан улам Баткендеги кооптуу аймактардан 11 миң 52 адам эвакуацияланды. Алардын 1 миң 410у коопсуз аймактагы үйлөргө көчүрүлсө, 642 адам убактылуу түзүлгөн пункттарга жайгаштырылды.

Өзгөчө кырдаалдар министрлигинин маалыматына ылайык, Баткен районунун Орто-Баз, Жака-Орук, Үч-Дөбө, Ак-Татар, Самаркандек, Ак-Сай, Таш-Тумшук айылдарынан болжол менен 6000ге жакын тургун Рават айылына эвакуацияланды.

"Лейлек районунун Максат айылынан 400 адам Маргун айылынан, Интернационал айылынан 1000дей жаран Кайрагач айылына көчүрүлдү. Ошондой эле Сада аймагынын, Ак-Арык айылынын жана Раззаков айылынын жергиликтүү жашоочулары Исфана жана Сүлүктүгө эвакуацияланды.

Самаркандек жана Ак-Татыр айылынын 1000дей жашоочусу Лейлек, Кара-Суу, Ак-Теректеги үйлөргө жайгаштырылды", - дешет маалымат кызматынан.

Баткен облусунун Кыргыз-Тажик чек арасына жакын аймактардагы ок атышуу токтоп, бүгүн, 28-январь саат 08:00гө карата абал туруктуу. Ок атышуунун кесепетинен 11 кыргыз аскери жаракат алды.

Чек арадагы аскерлер күчөтүлгөн тартипте кызмат өтөп жатат.

Автор: Бактыгүл Момбекова