"Министр, колуңду тарт!". Сабырбек Жумабековду колдогон дарыгерлер кайрылуу жасады

Травматология, ортопедия жана илим изилдөө борборун жоюп, ордуна башка оорукана түзүүгө жана анын жетекчиси Сабырбек Жумабековду иштен кетирүүгө нааразы болгон аталган борбордун дарыгерлери жана кызматкерлери кайрылуу жасады.

Анда борбордун кызматкерлери топтолуп, алардын атынан бир нечеси кайрылуу кылышты.

Алар "Колуңду тарт биздин борбордон" деп кыйкырып турушту.

"Бул кайра түзүү эмес, бул бүлдүрүү. Бир нерсени жаратуу кыйын, бүлдүрүү оңой. Бул аракеттериңерди токтоткула. Эгер биздин талаптарыбыз аткарылбаса, радикалдуу аракеттерге барабыз", - деди дарыгер Жаныш Сулайманов.

"Биз президенттен суранабыз, сактап калыңыз. Анткени биз алдыга жылышыбыз керек", - деди дагы бир дарыгер Арстанбек Иманалиев.

Кечээ саламаттык сактоо министри Алымкадыр Бейшеналиев кайрылуу жасап, "Жумабеков басып алган оорукананы элге кайтаруу керек" деген пикирин билдирген.