Токмокто унаасына жасалма документтерди пайдаланып жүргөн айдоочу кармалды

Унаасына жасалма документтерди пайдаланып жүргөн жаран Токмок шаардык милициясына өткөрүп берилди. Бул тууралуу ИИМдин басма сөз кызматынан маалымдашты.

Маалыматка ылайык, "Унаа" мамлекеттик мекемесинин Чүй-Кемин бөлүмүнүн кызматкерлери тарабынан Токмок шаарында өзүм билемдик менен унаасынын каттоо күбөлүгүнө жасалма жол менен кошумча шаймандарды тагып жүрүүгө уруксат деген өзгөчө белгини бастырып алган айдоочу аныкталды.

"Фольксваген-Пассат унаасын кайра каттоого барганда, анын каттоо күбөлүгүндө шектүү мөөр менен жасалма кол коюлганын Чүй-Кемин бөлүмүнүн кызматкери байкап калган. Андан соң алар Токмок шаардык милиция бөлүмүнө кайрылышкан. Учурда кылмыш ишинин чоо-жайын териштирүү процесси жүрүп жатат. Мындан аркы териштирүү иштерин жүргүзүү үчүн айдоочу тергөө органына жеткирилди", - деп жазылат маалыматта.

Автор: Жолдубек Качкынбаев