Баланы 1-класска киргизүү үчүн кайсы документтерди даярдоо зарыл? Кимдерге жеңилдик каралган?

2022-2023-жылдын окуу жылына карата 1-класска кабыл алуу үчүн электрондук каттоо 11-апрелде башталат. Бул тууралуу Бишкек мэриясынын расмий сайтында жарыяланды.

Маалыматка ылайык, электрондук каттоо mektep.edu.gov.kg сайтында жүргүзүлөт.

Каттоодон өтүү үчүн төмөнкү документтерди 11-апрелге чейин даярдоо сунушталат:

- паспорт;
- баланын туулгандыгы жөнүндө күбөлүк;
- ата-эненин же баланын мыйзамдуу өкүлүнүн паспортундагы персоналдуу идентификациялык номери;

- Мамлекеттик каттоо кызматынын электрондук каттоосундагы дарегин текшерүү зарыл.

Мектепке электрондук каттоо автоматташтырылган маалыматтык системанын программалык деңгээлде кийинки мыйзамдуу жеңилдикке ээ жарандарга артыкчылык берет:

аскер кызматчыларынын балдары, үй-бүлөсүнүн жашаган жери боюнча;
тийиштүү маалымкатты берүү менен Кыргыз өлкөсүнө көчүп келген, кайрылман статусуна ээ болгон этникалык кыргыздардын балдары.
ушул жылдын 15-сентябрына карата жалпы билим берүү уюмунда бир жылдан кем эмес иштеген мектеп мугалимдеринин жана кызматчыларынын балдары.

Эскертүү: Жогорудагы жеңилдик алгандар 11-апрелге чейин иштеген жеринен маалымкат даярдашы зарыл.

Белгилей кетсек, электрондук каттоо 11-апрелде башталып, 24-июнда аяктайт. Ал эми каттоодон өткөн соң документтерди 1-августтан 15-сентябрга чейин кабыл алынган мектептерге тапшыруу зарыл.

Автор: Айжанар Рыспек кызы