Парламент комитетинде Бишкектеги абанын булганышын төмөндөтүү боюнча чаралар жөнүндө токтомдун аткарылышы талкууланды

Бүгүн, 28-февралда парламент комитетинде Бишкектеги абанын булганышын төмөндөтүү боюнча чаралар жөнүндө токтомдун аткарылышы талкууланды.

Жыйында жаратылыш ресурстары, экология жана техникалык көзөмөл министринин орун басары Канатбек Садыков баяндама жасады.

Депутат Жаныбек Кыдыкбаев жаңы конуштарда сейил бак зоналары жок экенин жүйө келтирип, ирригациялык системанын жоктугунан “Тынчтык” жаңы конушундагы бак-дарактар куурап жатканын кошумчалады. Муну менен катар көчөлөрдү жууп, сугаруу жана нымдоо технологияларын колдонуу демилгесин карап чыгууну сунуштады. Ошондой эле депутаттар Алишер Козуев менен Мирлан Самыйкожо абанын булганышынын деңгээли автоунаалардан чыккан зыяндуу заттардан улам көтөрүлүп жатканын белгилеп, унаалардын катализаторлорун алып-саткандарга чара көрүү маселесин көтөрүштү.

Бир катар депутаттар Бишкек шаарынын ирригация системасын калыбына келтирүү керектигин айтып, көп кабаттуу үйлөрдү курууда экологиялык, санитардык ченемдерди сактоо менен шамалдын багытын да эске алуу керектигин кошумчалашты.

Автор: Жылдыз Джускембаева