Министрлер кабинети энергетикалык тармакты өнүктүрүү боюнча форум өткөрөт

Министрлер кабинети Дүйнөлүк банк тобунун көмөгү менен 8-апрелде Бишкекте «Кыргыз Республикасынын энергетика тармагын трансформациялоо келечектин жеткиликтүү жана туруктуу энергияга карай жолунда» аттуу энергетикалык форум өтөрүн кабарлады.

Маалыматка караганда, иш-чаранын алкагында энергетикалык реформалардын жана инвестициялык кызматташуунун негизги багыттары, өлкөнүн энергетика тармагындагы реформаларды колдоо боюнча эл аралык өнүктүрүү боюнча өнөктөштөрдүн өз ара аракеттенүүсүн жакшыртуу маселелери талкууланат.

Форумга министрлер кабинетинин төрагасы Акылбек Жапаров, эл аралык өнүктүрүү боюнча өнөктөштөр, мамлекеттик орган өкүлдөрү жана инвесторлор катышат.

Форум сессияларынын алкагында катышуучулар жеке сектордун катышуусунда күн энергетикасын өнүктүрүү боюнча министрлер кабинетинин приоритеттерин, энергетикалык секторду реформалоо стратегиясын (реформалардын жана артыкчылыктуу инвестициялардын жол картасы), энергетикалык сектор маселеси боюнча калкты социалдык жактан колдоо чараларын талкуулайт. Мындан тышкары «Кыргыз Республикасында күн энергетикалык долбоорлорду ишке ашыруу үчүн жагымдуу шарттар» панелдик дискуссиясы орун алып, ошондой эле эл аралык финансы институттарынын ата мекендик энергетикалык секторду реформалоого кошкон салымы тууралуу маселе талкууланат.

Автор: Кенжебай Сатканалиев