Эне тилге эки мүнөт: "Бет бактырбоо", "Ышы күбүлүү" фразеологизмдеринин маанисин билесизби?

"Эне тилге эки мүнөт" рубрикабыздын бул жолку чыгарылышында "Ышы күбүлүү", "Ортосу суу" жана "Бет бактырбоо" фразеологизмдеринин маанисин кыргыз тили жана адабияты мугалими Нурислам Эргешалиев түшүндүрүп берди.

Ышы күбүлүү - Болгон мүмкүнчүлүгүнөн, колундагысынан ажырап мүнкүрөп калуу. Мисалы, Малына чиренген байлар бир жолку жутта эле ышы күбүлүп, ит көрбөгөн күндү көрүп калышты.

Ортосу суу - Мамилелери солгундоо, начарлоо. Мисалы, Алымкул аталыктын киши колдуу болушуна булардын ортолору ого бетер сууп кетти.

Бет бактырбоо - Айтканга көнбөө, моюн сунбоо, чендетпөө, жолотпоо. Мисалы, Алкынган албуут катын тажаалданып, Алмакемди бет бактырбайт.