Алексей Тепляшин 100 тонналык жүктү сүйрөп, Кыргызстандын рекордун жаңылады (фото)

Спортчу Алексей Тепляшин 100 тонналык темир жол вагонун ордунан жылдырып, Кыргызстандын рекордун жаңылады. Бул тууралуу "Кыргыз темир жолу" ишканасынан билдиришти.

Билдирүүгө ылайык, спортчу жонуна илинген кайыш кур менен чиркештирилген 4 вагонду жана кошумча салынган жүктү дээрлик 8 метр аралыкка чейин жылдырган. Ал эми жүктүн жалпы салмагы 100 тонна 150 килограммды түзгөн.

"Алексей Тепляшин бул сынакка жарым жылдан ашуун даярданып, 40 жашка чыккан туулган күнүндө максатын ишке ашырды. Темир жол вагонун ордунан жылдыруу боюнча жаңы коюлган рекордду ал Кыргызстандын жалпы элине арнай турганын билдирди", - деп билдиришти аталган ишканадан.

Автор: Азат Бейшенбеков
Фото: Кыргыз темир жолу