Кара-Кулжада 2 жыл мурун курулган көпүрөнү сел алып кетти

Кара-Кулжа районунда нөшөрлөп жааган жамгырдын кесепетинен сел жүрдү. Бул тууралуу облустук милициядан кабарлашты.

Ага ылайык, Чалма айыл аймагынын Буйга айылынын Беш-Кемпир чегинде кокту-колоттордон түшкөн сел болжол менен саат 18:00 чамасында 2020-жылы курулган унаа көпүрөнү толугу менен алып кеткен. Жабыркагандар жок.

Көпүрө 2020-жылы ӨКМ тарабынан "Атайын алдын алуу жана кесепеттерин жоюу иш-чаралар" мерчеминин негизинде курулган. Бул жагдай боюнча маалымат Кара-Кулжа РИИБнин маалыматтардын электрондук журналына катталып, териштирүү иштери жүргүзүлүп жатат.

Сел жүргөн аймакта милиция кызматкерлери коопсуздук чараларын көрүшүүдө.

Автор: Айжанар Рыспек кызы