Кыргыз-өзбек чек арасы тууралуу депутаттын билдирүүсүнө УКМК жооп берди

Кечээ, 11-майдагы Жогорку Кеңештин жыйынында депутат Ырысбек Атажанов Баткен облусундагы кыргыз-өзбек чек арасында жайгашкан кыргыз айылына коңшу өлкөнүн аскерлери келип зым тартып жатканын айткан.

Эл өкүлү Баткендин Кадамжай районундагы Маркас айыл өкмөтүнүн Арпа-Сай айылынын тургундары кайрылып, Өзбекстандын чек ара кызматкерлери Кыргызстандын аймагына кирип арык казып, зым тартып жатканын кабарлашканын билдирген.

Бүгүн, 12-майда УКМК бул билдирүүгө жооп кайтарып, аталган тилкеде делимитация иштери аяктап, учурда ал жерде Өзбекстандын чек арачылары инженердик иштерди алып барып жатканын кабарлады.

“Кыргызстан жана Өзбекстандын ортосундагы 2017-жылы 5-сентябрдагы келишимине ылайык, Арпа-Сай айылынын Пылдырак аймагындагы тилке боюнча делимитация иштери аяктаган. Бул келишим 2017-жылы 28-сентябрда Жогорку Кеңеш тарабынан ратификацияланган.

Учурда Өзбекстандын чек арачылары инженердик иштерди жүргүзүп жатышат”, - деп айтылат атайын кызматтын маалыматында.

Ошондой эле чек арадагы элге өзбек тарап инженердик иштерди жүргүзөрү тууралуу жергиликтүү бийлик тарабынан түшүндүрүү иштери жүргүзүлүп жатканын кошумчалашкан.

Автор: Кенжебай Сатканалиев