Өлкөдө жөлөк пулдун өлчөмү көбөйтүлдү. Кимге канча кошулат?

Президент Садыр Жапаров "Калктын аярлуу катмарларынын айрым категорияларына мамлекеттик колдоону күчөтүү жөнүндө" жарлыкка кол койду. Бул тууралуу президенттик администрациядан билдиришти.

Жаңы жарлыкка ылайык, ушул жылдын 1-июнунан тарта мамлекеттик төлөмдөрдүн төмөнкү түрлөрүнүн өлчөмдөрү көбөйтүлөт:

– 16 жашка чейинки балдары бар муктаж жарандарга (үй-бүлөлөргө) – 810 сомдон 1200 сомго чейин;

– I топтогу ден соолугунан мүмкүнчүлүгү чектелүү адамдарга – 2500 сомдон 5500 сомго чейин;

– II топтогу ден соолугунан мүмкүнчүлүгү чектелүү адамдарга – 2000 сомдон 3000 сомго чейин;

– III топтогу ден соолугунан мүмкүнчүлүгү чектелүү адамдарга – 1500 сомдон 2000 сомго чейин;

– ата-энесинин биринен айрылган балдарга берилүүчү ар айлык жөлөк пул – 2000 сомдон 3000 сомго чейин;

– баатыр энелер үчүн ар айлык жөлөк пул – 2500 сомдон 3000 сомго чейин;

– улгайган жарандар үчүн – 1500 сомдон 2000 сомго чейин;

Мындан тышкары бирөөнүн камкордугуна жана көзөмөлүнө муктаж жарандарды жана бала кезинен I топтогу ден соолугунун мүмкүнчүлүгү чектелгендерди (18 жаштан жогору) баккан адамдар үчүн да атайын каражат бөлүп берүү боюнча жарлыкка кол коюлган.

Ошондой эле 2002-жылдагы 17-18-март окуяларында, 2010-жылкы апрель-июнь окуяларында жана 2021-жылдын 28-30-апрелинде болгон чек ара жаңжалында каза болгондордун үй-бүлө мүчөлөрүнө жана жабыр тарткан жарандарга берилүүчү жөлөк пулдун өлчөмүн жогорулатуу боюнча да атайын тапшырма берилгени маалымдалды.

Автор: Жанбулат Жумабеков