Элчилик: "Орусияда жүргөн Кыргыз жарандары былтыр баңгизатка байланыштуу 327 кылмыш иштерин жасаган"

Былтыр Орусиянын аймагында жүргөн Кыргыз жарандары баңгизатка байланыштуу 327 кылмыш иштерин жасаган. Бул туурасында Кыргызстандын Орусиядагы элчилиги тарабынан белгилүү болду.

Маалым болгондой, кыргыз тараптын демилгеси менен консул Алмаз Букалаев Орусиянын Ички иштер министрлигинин Баңгизаттарды мыйзамсыз жүгүртүүгө каршы күрөшүү боюнча башкы башкармалыгынын башчысынын орун басары Савочкин менен жолугушту.

Жыйында Орусияда жашап, иштеп жүргөн кыргыздардын арасында баңгизаттарды мыйзамсыз жүгүртүүгө байланыштуу кылмыштардын жана укук бузуулардын алдын алуу жана түшүндүрүү маселелери талкууланды.

Консул баңгизаттарды мыйзамсыз сатуу фактысы боюнча мекендештерди кармоо фактылары көбөйүп жатканына тынчсыздануусун билдирди. Өз кезегинде орус тарап келген эмгек мигранттарынын арасында баңги кылмыштарын аныктоого, алдын алууга жана бөгөт коюуга багытталган биргелешкен иш-чараларды өткөрүүгө кызыкдарлыгын билдирди.

"2021-жылы Кыргыз жарандары Орусияда баңгизатка байланыштуу 327 кылмыш иштерин жасаган. 2021-жылы баңгизаттарды мыйзамсыз сатуу фактылары боюнча кармалган 3 миңге жакын чет элдик жарандардын 224ү Кыргызстандын жараны .

2022-жылдын биринчи кварталында мекендештер тарабынан баңгизаттарды мыйзамсыз жүгүртүү чөйрөсүндө 90го жакын кылмыш жасалган, бул 2021-жылдын ушул мезгилине салыштырмалуу 45,2 пайызга көп. Негизинен Кыргыз жарандары курьер, ломбард, жүк ташуучу катары кылмыш иштерине аралашат", - деп айтылат элчиликтин маалыматында.

Автор: Бактыгүл Момбекова