Капотунда адам отурганына карабай унаасын айдап кеткен айдоочуга айып пул салынды

Буга чейин социалдык тармактарда унаа капотунда отурган адамга карабай жүрүп кеткен видео тараган. Аталган унаанын айдоочусу аныкталып, ага 7 жарым миң сом айып пул салынды. Бул туурасында бүгүн, 23-майда Милициянын кайгуул кызматынан кабарлашты.

Мекемеден окуя 21-майда Жаш Гвардия бульвары жана Лев Толстой көчөлөрүнүн кесилишинде орун алганын билдиришти. Анда эки тарап урушуп кеткен.

"Кайгуул кызматкерлери издеп табуу иш-чараларын жүргүзүп, унаага жабышкан жаранды сүйрөгөн айдоочуга Укук бузуулар кодексинин 189-беренесине ылайык (Авто ээнбаштык) 7500 сом айып салып, унаа айып короосуна киргизилди. Ал эми унаанын үстүндөгү жаранды издеп табуу иштери уланууда", - дешти басма сөз кызматынан.

Автор: Бактыгүл Момбекова