Өлкөдө фермер, дыйкандарга 3 жарым миллиард сом жеңилдетилген насыя берилди

"Айыл чарбасын каржылоо-10" долбоорун ишке ашыруунун алкагында бүгүнкү күндө жалпысынан 3 миллиард 396,5 миллион сомго 6 миң 746 насыя таратылды. Бул тууралуу министрлер кабинетинин маалымат кызматынан билдиришти.

Анын ичинен 5557 насыя күрөөсү менен жалпы 3 миллиард 155,1 миллион сомго, ал эми 241,4 миллион сомдук 1189 насыя күрөөсүз берилген.

Айыл чарба өсүмдүктөрүн өстүрүү багытында күрөө коюлган шартта 868,8 миллион сом суммасында 1840 насыя, 128,7 миллион сомго күрөөсүз 640 насыя берилди.

Мал чарбасын өнүктүрүүгө күрөө менен 1 миллиард 881,6 миллион сомдук 3572, күрөөсүз 112,6 миллион сомго 549 насыя берилген.

Айыл чарбасынын кайра иштетүү чөйрөсүн өнүктүрүү жана кызмат көрсөтүү үчүн күрөөлүк негизде 404,6 миллион сом суммасында 145 насыя таратылган.

Автор: Алина Айдарбекова