Путин чокусундагы Украинанын желеги Кыргызстандын желегине алмаштырылды

Орусиянын президенти Владимир Путиндин ысымы ыйгарылган туу чокуда Украинанын желеги Кыргызстандын желегине алмаштырылды. Бул тууралуу Кыргызстандын Альпинизм федерациясынын президенти Эдуард Кубатов билдирди.

Ал социалдык тармактагы баракчасына: "Абдан кыйын жана узак күн. Кыргыз Республикасынын желегин көтөрдүк. Биздин туубуз мындан ары да бардык чокуларыбызда болот", - деп жазды.

Буга чейин социалдык тармакта аталган Путин чокусунда Украинанын желеги турган видео жарыяланган. Кийинчерээк видеонун авторлору милицияга чакырылган.

Аталган чоку 2011-жылы Орусиянын президенти Владимир Путиндин урматына аталган. Путин чокусу деңиз деңгээлинен 4446 метр бийиктикте, Бишкектен анча алыс эмес Ак-Суу капчыгайында жайгашкан.

Автор: Каныкей Амантаева