Жоомарт Оторбаев: “2014-жылы алтындын баасынын төмөндөшүнө байланыштуу 1 миллиард сом албай калышыбыз мүмкүн”

Бишкекте бүгүн, 29-ноябрда “Республика” фракциясынын жыйынында биринчи вице-премьер-министр Жоомарт Оторбаев “2014-жылы алтындын баасынын төмөндөшүнө байланыштуу Кыргызстандын казынасына 1 миллиард сомго жакын каражат түшпөй калуусу мүмкүн” деп билдирди.

Анын айтымында, алтындын баасынын төмөндөшү киреше бөлүгүнүн кыскарышынын ири тобокелдиктеринин бири болуп саналат.

“Өткөн жылы биз алтындын 1 унциясы 1 миң 750 доллар болорун болжолдогонбуз. Учурда бул көрсөткүч 1 миң 240 долларды түзөт. Быйыл болсо ушул эле сумманы көрсөтүп жатабыз”,- деди Оторбаев.

Ал 2014-жылы казынанын киреше бөлүгү 106,6 миллиард сомго божомолдонуп жатканын белгилеп өттү.

Автор: Айпери Ганыжан кызы